Yashastilaka 4.113.1

4.113.1

punaḥ kathaṃbhūtaṃ dūtam | nijaprajñātiśayāvahelitapulahapulomapulastipālakāpyakātyāyanapratijātam nijaprajñātiśayena ātmamatiprakarṣeṇa avahelitaṃ pulahasya ṛṣiviśeṣasya tathā pulomasya tathā pulasteḥ tathā pālakāpyasya kāvyasya vā | dvayaṃ bhinnam | kātyāyanasya vararucermatīnāṃ jātaḥ samūho yena sa tathoktastam | tathā hi tamevālaṃkāryaṃ ākṣapaṭaliko brūte—garvamityādi | re barbara sapādalakṣakṣaparvatādhīśa, tvaṃ garvaṃ muñca madaṃ parihara mithyābhimānaṃ tyaja | re pañcālakāḥ pañcāladeśodbhavāḥ kṣatriyāḥ, cāpalaṃ capalatvaṃ mā naiva carata kuruta yūyam | re kerala malayācalanikaṭavartin, tvaṃ keliṃ krīḍā saṃhara saṃkocaya | re madreśa madradeśādhīśa, tvaṃ deśāntaraṃ aparadeśaṃ praviśa praveśaṃ kuru | sa jagatprasiddho devo yaśodharamahārājaḥ itthamamunā prakāreṇa vo yuṣmākaṃ ṭiriṭillitaṃ ātmano'nucitaṃ vyavahāraṃ na sahate na mṛṣyati na kṣamate | kathaṃbhūtānāṃ vaḥ | mithyaiśvaryabalāvaleparabhasabhraśyadvivekātmanām mithyā nirarthakaṃ yadaiśvaryaṃ balāvalepaśca sainyagarvaḥ tena rabhasena vegena bhraśyan vigalan viveko heyopādeyacāturyaṃ ātmanā yeṣāṃ tathoktāsteṣām | kathaṃbhūto devaḥ | daivāśrayaḥ | puṇyainādhikatara ityarthaḥ | samuccayālaṃkāraḥ ||