Yashastilaka 4.441.3

4.441.3

daśanacchadoddeśadaṃśaprakāśapeśalāsu dantacchadasyoddeśaḥ pradeśastatra yo'sau daṃśo dantacchadarudrataḥ prakāśaḥ śobhā tena peśalā manoharāstāsu | kiṃ kurvantīṣu | vikasantīṣu sphuṭantīṣu | punaḥ kāsu satīṣu | mākandamañjarīṣu āmravallarīṣu satīṣu | kathaṃbhūtāsu | surataśramasaṃjātajalajālakalipiṣu surataśrameṇa saṃjātaṃ yajjalajālakaṃ svedavṛndaṃ tadrūpilipiravayavo yāsāṃ tāstāsu | kiṃ kurvantīṣu | vilasantīṣu ullasantīṣu | punaḥ keṣu satsu | mallikākukuleṣu mallikāvelikuṅmaleṣu satsu | kathaṃbhūteṣu | dīrghāpāṅgabhaṅgisubhageṣu dīrghā āyatā ye apāṅgā locanaprāntāsteṣāṃ bhaṅgī racanā tayā subhagāni yeṣu | kiṃ kurvatsu | sphuṭatsu vikasatsu | punaśca keṣu satsu | pikapākakulakolāhaleṣu pikapākāḥ puṃskokilāsteṣāṃ kulāni teṣāṃ kolāhalāste tathā teṣu satsu | kathaṃbhūteṣu | kalagalālasilīleṣu kalā madhurā yā galālaptayaḥ kaṇṭhakūjitāni tāsāṃ līlā śobhā yeṣu | kiṃ kurvatsu | samucchalatsu utpadyamāneṣu | punaśca kāsu satīṣu | vanavasudhāsu satīṣu | kathaṃbhūtāsu | cikuraruciracañcarīkacaraṇacāpalanalitavikacavicikilagalanmakarandasyandasārdrāsu cikurāḥ keśāsteṣāṃ ruciḥ dīptistadvat rucirā manoharā ye cañcarīkā bhramarāsteṣāṃ caraṇānāṃ yaccāpalaṃ tena calitāni vikacāni vikasitāni vicikilāni muktabandhupuṣpāṇi tebhyo galan nirgalan yo'sau makarandastasya syandena sravaṇena sārdrāḥ sarasāstāsu | kiṃ kurvantīṣu | bhavantīṣu saṃjāyamānāsu | punaśca keṣu satsu | mādhavīkusumastabakeṣu vasantavallīpuṣpaguccheṣu satsu | uktaṃ ca- 'mādhavī madhuśarkarā | vāsantī kundanī latā' |