Yashastilaka 6.143

6.143

samantādabhyāsena | anantavārān punaḥ punarabhyāsena bhuktaṃ muktaṃ cetyarthaḥ | tarhi kimarthaṃ bhuktamuktaṃ vartate kiṃvā sarvamevānubhuktamuktam, tajjagatprasiddhaṃ kevalamekaṃ dhāma sthānaṃ jātu kadācidapi kutūhaladhiyā vinodenāpi spṛṣṭaṃ na vartate | kathaṃbhūtaṃ taddhāma | vigalitākhilakarmajālam vigalitāni naṣṭāni akhilāni samastāni mūlottaraprakṛtibhedabhinnāni karmajālāni karmasamūhāni yasmin yasmādvā tathā | jālyalaṃkāraḥ || iti lokānuprekṣā samāptā || āpātaramyaracanairityādi | he hatajīva hato naṣṭaścāsau jīvaḥ hatajīvaḥ, athavā hatā jīvāḥ prāṇino yena sa hatajīvastasya saṃbodhanaṃ kriyate he hatajīva, tat tvaṃ navaprayātaṃ pratyagramāyātaṃ karmavipākaṃ sahasva kṣamasva anubhava | tatkim | yat enaḥ pāpaṃ arjitavān | kathaṃbhūtamenaḥ | duḥkhānuṣaṅgakaraṃ śārīramānasāgantukaduḥkhotpādakam | kathaṃbhūtastvam | sukhalavairvanitādibhogasukhaleśaiḥ skhalitāntaraṅgaḥ calitacittaḥ | kathaṃbhūtaiḥ sukhalavaiḥ | āpātaramyaracanaiḥ anubhavakāle manoharavidhānaiḥ | punaḥ kathaṃbhūtaiḥ sukhalavaiḥ virasāvasānaiḥ virasaṃ kaṭutaraṃ nīrasaṃ avasānaṃ paryanto yeṣāṃ tāni tathā taiḥ | punaḥ kathaṃbhūtaiḥ sukhalavaiḥ | janmodbhavaiḥ saṃsārotpannaiḥ iṣṭastrīvanitācandanādibhiḥ athavā janma saṃsāraḥ tasyodbhava utpattiryeṣāṃ sukhalavānāṃ te tathā taiḥ | jālyalaṃkāraḥ || kāluṣyamityādi | he jīva, yastvaṃ iha asmin saṃsāre kāluṣyaṃ pariṇāmasyānirmalatvameṣi gacchasi | katham | svayamātmanaiva | kathaṃbhūtastvam | ātmakāmaḥ ātmani kāmo viṣayābhilāṣo yasya sa ātmakāmaḥ | tatra ātmakāme nanu niścayena te tava