Yashastilaka 4.282

4.282

evamaśeṣakriyāsauṣṭhava, pratiṣṭhādhiṣṭhānāyāṃ śubhasthāpanāyām | sthirasthitasamastāṅgasaṃgarbha, śikṣāvekṣaṇākṣuṇṇāntaḥkaraṇagarbha, marīcimattaṅgamṛgaśarmādimahāmunisamānītadarśitāvalokitagṛhītadhyātaniśśvitāṇḍakapālādaditisutaprasūtipūtāntarālādupāsitumāyātagaṇapativilokanaprahitanayanena tadvadanānurūpavapuḥsaṃpādanasamāhitahṛdayena saptasāmānyabhigāyatā pitāmahena vihitasakalasattvātiśāyideha, trilocanācyutavirañcivirocanacandracitrabhānuprabhṛtibhirdevatābhiḥ sabahuvismayamudīritaparasparasvāgatābhiradhiṣṭhitodāraśarīragehanikhilāparaprāṇigaṇāvāryavīrya, divijakuñjakuñjaravajrāpātaśaurya, dvijadevagandharvayakṣamahīkṣitāmanyatamasattvapada, kṣoṇīśamahāmātrakulakalyāṇaparamparāphalavarada, dvirada, he hala, divyasamāja, mātrāśataṃ tiṣṭha tiṣṭha
gātraistiṣṭha samaiḥ puronakhasamaṃ hastaṃ nidhehi kṣitau
dṛṣṭiṃ dehi karāgrataḥ sthiramanāḥ karṇau gajāśleṣaya
vāla dhāraya vatsa yāvadacirānmaunyāmahaṃ kalpaye
mātrāṇāṃ śatamāsva tāvadacalastvaṃ yogikalpākṛtiḥ