Yashastilaka 4.281.3

4.281.3

he śikṣāvekṣaṇākṣuṇṇāntaḥkaraṇagarbha śikṣāyā vinayasya yadavekṣaṇaṃ avalokanaṃ tena akṣuṇṇaḥ saṃpūrṇaḥ antaḥkaraṇagarbhaḥ manomadhyo yasya sa tathā tasya saṃbodhana he tathokta | he gaja, pitāmahena vihitasakalasattvātiśāyideha pitāmahena brahmaṇā vihito nirmitaḥ sakalasattvebhyaḥ atiśāyī atiśayavān dehaḥ śarīraṃ yasya sa tathā tasya saṃbodhana he tathokta | pitāmahena kasmādvihitaśarīraḥ | marīcimattaṅgamṛgaśarmādimahāmunisamānītadarśitāvalokitagṛhītadhyātaniśśvitāṇḍakapālāt marīciśca ṛṣiviśeṣaḥ, mataṅgaśca ṛṣiviśeṣaḥ, mṛgaśarmā ca ṛṣiviśeṣaḥ, marīcimattaṅgamṛgaśarmāṇaḥ ādiryeṣāṃ atryādīnāṃ te marīcimattaṅgamṛgaśarmādayaḥ, te ca te mahāmunayaḥ vṛhṛṣayaḥ taiḥ samānītaṃ brahmaṇaḥ saṃmukhamānītam, tacca darśitaṃ brahmacakṣurgocarīkṛtam, tacca avalokitaṃ pitāmahena dṛṣṭam, tacca gṛhītaṃ brahmaṇā svīkṛtam, tacca dhyātaṃ brahmaṇā cintitam, tacca ni'śvitaṃ brahmaṇā nirṇītam | 'evaṃ ṣaḍviśeṣaṇaviśiṣṭaṃ yat aṇḍakapālaṃ brahmāṇḍasya kapālaṃ ardhastasmāt | kathaṃbhūtāt aṇḍakapālāt | aditisutaprasūtipūtāntarālāt aditisutaḥ śrībhāskaraḥ tasya prasūtirutpattiḥ tayā pūtaṃ pavitraṃ antarālaṃ madhyaṃ yasya brahmāṇḍārdhasya tattathoktaṃ tasmāt | kathaṃbhūtena pitāmahena | upāsituṃ sevituṃ āyātagaṇapativilokanaprahitanayanena āyātaḥ āgato yo'sau gaṇapatirvināyakaḥ tasya vilokane darśane prahite prerite nayane locane yena pitāmahena | punaḥ kathaṃbhūtena pitāmahena |