Pramanamimamsa 2.1.46

2.1.46

eṣveva vādiprativādyubhayāsiddheṣveva . tatra viśeṣyāsiddhādaya udāhriyante . viśeṣyāsiddho yathā anityaḥ śabdaḥ sāmānyavattve sati cākṣuṣatvāt . viśeṣaṇāsiddho yathā anityaḥ śabdaścākṣuṣatve sati sāmānyaviśeṣavattvāt . bhāgāsiddho yathā anityaḥ śabdaḥ prayatnānantarīyakatvāt . āśrayāsiddho yathā asti pradhānaṃ viśvapariṇāmitvāt . āśrayaikadeśāsiddho yathā nityāḥ pradhānapuruṣeśvarāḥ akṛtakatvāt . vyarthaviśeṣyāsiddho yathā anityaḥ śabdaḥ kṛtakatve sati sāmānyavattvāt . vyarthaviśeṣaṇāsiddho yathā anityaḥ śabdaḥ sāmānyavattve sati kṛtakatvāt . sandigdhaviśeṣyāsiddho yathā adyāpi rāgādiyuktaḥ kapilaḥ puruṣatve satyadyāpyanutpannatattvajñānatvāt . sandigdhaviśeṣaṇāsiddho yathā adyāpi rāgādiyuktaḥ kapilaḥ sarvadā tattvajñānarahitatve sati puruṣatvādityādi . ete'siddhabhedā yadānyataravādyasiddhatvena vivakṣyante tadā vādyasiddhāḥ prativādyasiddhā vā bhavanti . yadobhayavādyasiddhatvena vivakṣyante tadobhayāsiddhā bhavanti .. 19 ..