Kalpah 2.6.1.5_57

2.6.1.5_57

etā asadannityabhimantrayate .
viṣṇūni stha vaiṣṇavāni dhāmāni prājāpatyānītyājyāni .
sruveṇa gārhapatyadakṣiṇāgnyorājyārthānājyasyālpāḥ karoti juhvā dhruvāyā āhavanīye .
idamaham̐ senāyā abhītvaryai mukhamapohāmīti vedena dakṣiṇasmātpuroḍāśādaṅgārānapohyottarasmādapohati.
sūrya jyotirvibhāhi mahata indriyāyetyabhimantrayate syonaṃ te sadanaṃ karomi ghṛtasya dhārayā suśevaṃ kalpayāmīti pātryāmupastīryā''pyāyatāṃ ghṛtayoniragnirhavyā'numanyatām . khamaṅkṣva tvacamaṅkṣva surūpaṃ tvā vasuvidaṃ paśūnāṃ tejasā'gnaye juṣṭamabhidhārayāmītyāgneyamabhidhārayati tūṣṇīmuttaram .
yasta ātmā paśuṣu praviṣṭo devānāṃ viṣṭhāmanu yo vitasthe . ātmanvānsoma ghṛtavānhi bhūtvā devāngaccha suvarvinda yajamānāya mahyamiti śṛtam.
ārdraḥ prathasnurbhuvanasya gopāḥ śṛta utsnāti janitā matīnāmiti puroḍāśamudvāsayatyabhindannaparyāvartayan .
vedena bhasma parimṛjya .
tasminsīdāmṛte pratitiṣṭha vrīhīṇāṃ medha sumanasyamāna ityupastīrṇe pātryāṃ nidadhāti .
irā bhūtiḥ pṛthivyai raso motkramīdityekai- kaśaḥ kapālānyabhighārya saṃkhyāyodvāsayati .
devastvā savitā madhvā'naktviti puroḍāśamanakti .
svaktamakūrmapṛṣantamaparivargamaṇikāṣamupariṣṭādabhyajya sruveṇa hastenādhastādupānakti .
priyeṇa nāmnā priyam̐ sada āsīdatāmityapareṇa srucaḥ puroḍāśāvāsādayati dakṣiṇamāgneyamuttaramitaram .
madhye vedeḥ sānāyyakumbhyau saṃdhāya vyūhati dakṣiṇasyām̐ śroṇyām̐ śṛtamuttarasyāṃ dadhi .
ayaṃ vedaḥ pṛthivīmanvavindadguhā sato gahane gahvareṣu . sa vindatu yajamānāya lokamacchidraṃ yajñaṃ bhūrikarmā karotvityagreṇa dhruvāṃ vedaṃ nidhāya .
vedyantānparistīrya .
hotṛṣadanaṃ kalpayati kalpayati .. 27 ..