Kalpah 2.6.2.p45

2.6.2.p45

somāya pitṛpītāya svaghā nama iti prathamāmāhutiṃ juhoti yamāyāṅgirasvate pitṛmate svadhā nama iti dvitīyāmagnaye kavyavāhanāya sviṣṭakṛte svadhā nama iti ye mekṣaṇe taṇḍulāstāñjuhoti .. 17 ..
tūṣṇīṃ mekṣaṇamādadhāti .
ye rūpāṇi pratimuñcamānā asurāḥ santaḥ svadhayā caranti . parāpuro nipuro ye bharantyagniṣṭānasmātpraṇunoktu lokāditi dakṣiṇāgnerekolmukaṃ dhūpāyatparā- cīnam̐ hṛtvā dakṣiṇenaikasphyādeśe nidadhāti .
apahatā asurā rakṣāṃsi vediṣada ityavahananadeśe dakṣiṇāṃ dakṣiṇāprācīṃ vā sphyenaikasphyāṃ vedimullikhya .
udīratāmavara ityadbhiravokṣati .
sakṛdācchinnaṃ barhirurṇā mṛdu syonaṃ pitṛbhyastvā bharāmyaham . asminsīdantu me pitaraḥ somyāḥ pitāmahāḥ prapitāmahāścānugaiḥ saheti sakṛdācchinnena barhiṣaikasphyāstṛṇāti .
tasyām̐ sthālīpākaṃ nidadhāti .
dakṣiṇata āñjanamabhyañjanaṃ kaśīpūpabarhaṇamudakumbhaṃ ca pratiṣṭhāpayati .