Kalpah 2.6.6.12

2.6.6.12

antarvedi praṇītāsu mārjayate .
adhvaryuścāsmai saṃtatāṃ dhārā srāvayati sadasi sanme bhūyā ityānīyamānāsu japati . prācyāṃ diśi devā ṛtvijo mārjayantāmiti pratidiśaṃ vyutsiñcati samudraṃ vaḥ prahiṇomyakṣitāḥ svāṃ yonimapigacchata . acchidraḥ prajayā bhūyāsaṃ mā parāsecimatpaya iti śeṣaṃ ninayati.
yadapsu te sarasvati goṣvaśveṣu yanmadhu . tena me vājinīvati mukhamaṅgdhi sarasvatīti mukhaṃ vimṛṣṭe.
atra yajamānabhāgaprāśanameke samāmananti .
ata evopotthāya viṣṇoḥ kramo'sīti caturo viṣṇukramānkrāmati dakṣiṇena prakramya savyenānuprakrāmati na savyena dakṣiṇamatikrāmati nā''havanīyamatikrāmatyuttaramuttaraṃ jyāyām̐saṃ tiṣṭham̐ścaturthaṃ japati .
udyannadya mitramahaḥ sapatnānme anīnaśaḥ. divainānvidyutā jahi nimrocannadharānkṛdhi . udyannadya vi no bhaja pitā putrebhyo yathā . dīrghāyutvasya heśiṣe tasya no dehi sūrya . udyannadya mitramaha ārohannuttarāṃ divam . hṛdrogaṃ mama sūrya harimāṇaṃ ca nāśaya . śukeṣu me harimāṇam̐ ropaṇākāsu dadhmasi . atho hāridraveṣu me harimāṇaṃ nidadhmasi . udagādayamādityo viśvena sahasā saha . dviṣantaṃ mama randhayanmo ahaṃ dviṣato radham . yo naḥ śapādaśapato yaśca naḥ śapataḥ śapāt . uṣāśca tasmai nimrukca sarvapāpam̐ samūhatām . yo naḥ sapatno yo raṇo marto bhidāsati devāḥ . idhmasyeva prakṣāyato mā tasyoccheṣi kiṃcaneti ..12..