Kalpah 2.6.6.14

2.6.6.14

yajña śaṃ ca te yajña namo namaśca te yajña śivena me saṃtiṣṭhasvaṃ syonena me saṃtiṣṭhasva subhūtena me saṃtiṣṭhasva brahmavarcasena me saṃtiṣṭhasva yajñasyardhimanu saṃtiṣṭhasvopa te yajña nama upa te nama upa te nama iti japati .
vṛṣṭirasi vṛśca me pāpmānamṛtātsatyamupāgāmapsu śraddhetyapa upaspṛśya yathetaṃ pratiniṣkrāmati .
brāhmaṇām̐starpayitavā iti saṃpreṣyati .
evaṃ vihitaṃ pravasato'pi yājamānam .
yasyāmasya diśyagnayo bhavanti tāṃ diśamabhimukho mantrāñjapati .
adhvaryuḥ karmāṇi karoti .
anyānyabhimarśanāt ..
yajamāno mantrāñjapatyanyānvyādeśanāt .
evaṃ vihitamiṣṭipaśubandhānāṃ yājamānam .
yathāvikāramanumantraṇāḥ .
indrasya vaimṛdhasyāhaṃ devayajyayā'sapatno bhūyāsam̐ sarasvatyā ahaṃ devayajyayā vācamannādyaṃ puṣeyaṃ pūṣṇo'haṃ devayajyayā puṣṭimānpaśumānbhūyāsamadityā ahaṃ devayajyayā prajaniṣīya prajayā ca paśubhiśca dyāvāpṛthivyorahaṃ devayajyayobhayorlokayorṛdhyāsaṃ bhūmānaṃ pratiṣṭhāṃ gameyamaryamṇo'haṃ devayajyayā svargaṃ lokaṃ puṣeyaṃ viśveṣāṃ devānāmahaṃ devayajyayā prāṇaiḥ sāyujyaṃ gameyamindrasyendriyāvato'haṃ devayajyayendriyāvī paśumānbhūyāsamindrasya trāturahaṃ devayajyayā trāto bhūyāsamiti pratyakṣāmnātā anumantraṇāḥ .. 14 ..