Kalpah 2.6.7.p11

2.6.7.p11

ūrdhvasūrasi vānaspatyaḥ sudyumno dyumnaṃ yajamānāya dhehīti taṃ yajamānāya pradāya saṃbhārayajūm̐ṣi vācayati juhoti caitairmantraiḥ .
taṃ vāgyatamadīkṣiṣṭāyaṃ brāhmaṇo'sāvāmuṣyāyaṇo'muṣya putro'muṣya pautro'muṣya naptā'muṣyāḥ putro'muṣyāḥ pautro'muṣyā napteti trirupām̐śvāvedayati triruccaiḥ .
asāviti nāma gṛhṇātyāmuṣyāyaṇa iti piturnāmadheyena .
yaḥ kaściddīkṣate brāhmaṇa ityevā''vedayet .
devāñjanamaganyakṣastato mā yajñasyā''śīrāgacchatu gandharvāñjanamaganyajñastato mā yajñasyā''śīrāgacchatu pitṝñjanamaganyajñastato mā yajñasyā''śīrāgacchatvapa oṣadhīrvanaspatīñjanamaganyajñastato mā yajñasyā''śīrāgacchatu pañcajanāñjanamaganyajñastato mā yajñasyā''śīrāgacchatu vardhatāṃ bhūtirdadhnā ghṛtena muñcatu yajño yajñapatimam̐haso bhūpataye svāhetyabhimantrayate
yadyanyatra kṛṣṇājinādāsīta nityavṛttāvata ūrdhvam .
agnīñjyotiṣmataḥ kuruta dīkṣita vācaṃ yaccha patni vācaṃ yaccheti purādayamadhivṛkṣasūrye ca vratapradaḥ saṃpreṣyati .
udite'stamite ca vrataṃ dohayati vatsasyaikam̐ stanamavaśeṣya .