Kalpah 2.6.9.13

2.6.9.13

iti hiraṇyakeśisūtre navamapraśne caturthaḥ paṭalaḥ .
9.5 atha navamapraśne pañcamaḥ paṭalaḥ .
avabhṛthasya tantraṃ prakramayati .
tatra yāvatkriyate tadvyākhyāsyāmaḥ .
agnīnanvādhāya vedaṃ kṛtvā'gnīnparistīrya pāṇī prakṣālyolaparājīm̐ stīrtvā yathārthaṃ pātrāṇi prayunakti .
na praṇītāḥ praṇayati .
nirvapaṇakāle vāruṇamekakapālaṃ nirvapati .
yajurutpūtābhiḥ saṃyauti .
abhivāsita āpyalepaṃ ninīya saṃpraiṣeṇa pratipadyate.
yadanyadidhmābarhiṣaḥ patnīsaṃhanācca tatsaṃpreṣyati .
yatprāgājyagrahaṇāttatkṛtvā pratihṛtya
gārhapatya ājyāni gṛhṇāti .
sarvāṇi caturgrahītāni dvirvopabhṛti .
alaṃkṛtya puroḍāśamuttare'm̐se'vabhṛtham̐ sam̐sādayati .
puroḍāśamājyānyaudumbarīmadhiṣavaṇaphalake kharapām̐sūnṛjīṣaṃ ca yatkiṃca somaliptamanyatra catasṛbhyaḥ somasthālībhya āgrayaṇasthālyā ukthyasthālyā ādityasthālyā dhruvasthālyāḥ . āyurdā agne haviṣo juṣāṇa iti juhoti yatarasminnagnau śrapayati .
samupte'vabhṛthe.
prastotaḥ sāmāni gāyeti saṃpreṣyati saha patnyā triḥ sarve sāmno nidhanamupayanti .
urum̐ hi rājā varuṇaścakāreti cātvālaṃ gatvā vadanti cātvālādvā prayānto vadanti .
antareṇa cātvālotkarāvudañco niṣkrāmanti .
sarvā diśo'vabhṛthagamanamāmnātam .
nodīcena saṃcaritavā ityekeṣām .
madhyadeśe dvitīyam̐ sāmno nidhanamupayantyudakānte tṛtīyam .
śataṃ te rājanbhiṣajaḥ sahasrāmityapo dṛṣṭvā japanti .
abhiṣṭhito varuṇasya pāśa ityudakāntamabhitiṣṭhanti .
apaḥ pragāhya tiṣṭhanto'vabhṛthena caranti .
oḍhāsu devatāsūdakamupavājya sruvāghāramāghāryāgnīdudakaṃ triḥ saṃmṛḍḍhīti saṃpreṣyati .
saṃmṛṣṭe'psu tṛṇaṃ prāsya .
agneranīkamapa āviveśeti srucyamāghārayati .
yathopasatsvevaṃ pravaraṃ pravṛṇīte .. 13 .. tiṣṭhetyetāvānpravaraḥ.