Vidhimargaprapa 16.1

16.1

bhaṇai–‘porisi purimaḍḍho vā, tivihāraṃ cauvihāraṃ vā, ekāsaṇauṃ nivī āṃbilu vā, jā kāi velā, tīe
bhattapāṇaṃ pārāvemi’tti | tao sakatthayaṃ bhaṇiya, khaṇaṃ sajjhāyaṃ ca kāuṃ, jahāsabhavaṃ atihisaṃvibhāgaṃ kāuṃ,
muha-hatthe paḍilehiya, namokkārapuvvaṃ, arattaduṭṭho asurasuraṃ acavacavaṃ ahuyamavilaṃbiyaṃ aparisāḍiṃ jemei | taṃ
puṇa niyaghare ahāpavattaṃ phāsuyaṃ ti; posahasālāe vā puvvasaṃdiṭṭhasayaṇovaṇīyaṃ | na ya bhikkhaṃ hiṃḍei | tao
āsaṇāo acalitto ceva divasacarimaṃ paccakkhai | tao iriyāvahiyaṃ paḍikkamiya, sakatthayaṃ bhaṇai | jai
puṇa sarīraciṃtāe aṭṭho to niyamā dugāī āvassiyaṃ kariya sāhu va uvauttā nijjīvathaṃḍile gaṃtuṃ ‘aṇujāṇaha jassāvaggaho’ ti bhaṇiūṇa, disi–pavaṇa–gāma–sūriāisamayacihiṇā uccārapāsavaṇe vosiriya,
phāsuyajaleṇaṃ āyamiya, posahasālāe āgaṃtūṇa, nisīhiyāpuvvaṃ pavisiya, iriyāvahiyaṃ paḍikkamiya, khamāsamaṇapuvvaṃ bhaṇaṃti–‘icchākāreṇa saṃdisaha gamaṇāgamaṇaṃ āloyahaṃ’ | ‘icchaṃ’ āvassiyaṃ kariya, avara–dakkhiṇapaccuhadisāe gacchiya, disāloyaṃ kariya, saṃḍāsae thaṃḍilaṃ ca paḍilehiya, uccāra-pāsavaṇaṃ vosiriya, nisīhiyaṃ kariya, posahasālaṃ paviṭṭhā āvaṃtajaṃtehiṃ jaṃ khaṃḍiyaṃ jaṃ virāhiyaṃ tassa micchāmi dukkaḍaṃ | tao
sajjhāyaṃ tāva karei, jāva pacchimapahāro | jāe ya tammi khamāsamaṇapuvvaṃ ‘paḍilehaṇaṃ karemi, puṇo posahasālaṃ
pamajjemi’tti bhaṇai | tao puvvaṃ va aṃgapaḍilehaṇaṃ kāuṃ, posahasālaṃ daṃḍaga-puṃchaṇeṇa pamajjiya, kajjayaṃ uddhariya, paridvaviya, iriyaṃ paḍikkamiya, ṭhavaṇāyariyaṃ paḍilehiya ṭhavei | tao gurusamīve ṭhavaṇāyariyāsamīve vā
khamāsamaṇadugeṇa muhapottiṃ paḍilehiya, paḍhamakhamāsamaṇe ‘icchākāreṇa saṃdisaha bhagavan ! sajjhāyaṃ saṃdisāvemi’; bīe khamāsamaṇe ‘sajjhāyaṃ karemi’tti bhaṇiya, kāūṇa ya, vaṃdaṇayaṃ dāūṇa gurusakkhiyaṃ paccakkhāi
tao khamāsamaṇadugeṇa uvahithaṃḍilapaḍilehaṇaṃ saṃdisāviya, khamāsamaṇadugeṇa ‘vaisaṇaṃ saṃdisāvemi, vaisaṇe
ṭhāmi’tti bhaṇiya vatthakaṃbalāi paḍilehei | ittha jo abhattaṭṭhī so savvovahipaḍilehaṇāṇaṃtaraṃ kaḍipaṭṭayaṃ
paḍilehei | jo puṇa bhattaṭṭhī so kaḍipaṭṭayaṃ paḍilehiya, uvahi paḍilehei tti viseso | tao sajjhāyaṃ tāvakarei, jāva kālavelā | jāyāe ya tīe uccārapāsavaṇathaṃḍile cauvīsaṃ paḍilehiya, jai tammi diṇe cauddasī to pakkhiyaṃ caummāsiyaṃ vā; aha aṭṭhamī uddiṭṭhā punnamāsiṇī vā to devasiyaṃ; aha bhaddavayasuddhacautthī to saṃvacchariyaṃ, paḍikkamaṇasāmāyārīe paḍikkamiya sāhuvissāmaṇaṃ kuṇai | tao sajjhāyaṃ tāva karei
jāva porisī | uvariṃ jai samāhī to lahuyasareṇaṃ kuṇai; jahā khuddajaṃtuṇo na uṭṭhiṃti | tao asajjhamaṇaṇapurao bhūmipamajjaṇāivihivihiyasarīraciṃto khamāsamaṇadugeṇa muhapottiṃ paḍilehiya, khamāsamaṇeṇa rāīsaṃthārayaṃ saṃdisāviya, bīyakhamāsamaṇeṇa rāīsaṃthārae ṭhāmi tti bhaṇiya, sakatthayaṃ bhaṇai | tao saṃthāragaṃ
uttarapaṭṭaṃ ca jāṇugovari mīlittu pamajjiya bhūmīe pattharei | tao sarīraṃ pamajjiya, nisīhī ‘namokhamāsamaṇāṇaṃ’ti bhaṇiya, saṃthārae bhaviya, namokkāratiga sāmāiyaṃ ca uccāriya—
aṇujāṇaha paramagurū guṇagaṇarayaṇehiṃ bhūsiyasarīrā
bahupaḍipunnā porisi rāīsaṃthārae ṭhāmi