Vidhimargaprapa 16.12

16.12

§ 20. pakkhiyapaḍikkamaṇaṃ puṇa cauddasīe kāyavvaṃ | tattha ‘abbhuṭṭhiomi ārāhaṇāe’ ityāisuttaṃtaṃ devasiyaṃ
paḍikkamiya, tao khamāsamaṇadugeṇa pakkhiyamuhapottiṃ paḍilehiya, pakkhiyābhilāveṇaṃ vaṃdaṇaṃ dāuṃ, saṃbuddhākhāmaṇaṃ
kāuṃ, uṭṭhiya pakkhiyāloyaṇasuttaṃ ‘savvassa vi pakkhiya’ ityāipajjaṃtaṃ paḍhiya, vaṃdaṇaṃ dāuṃ bhaṇai—‘devasiyaṃ
āloiyaṃ paḍikkaṃtaṃ, patteyakhāmaṇeṇaṃ abbhuṭṭhio'haṃ abbhitarapakkhiyaṃ khāmemi’ tti bhaṇittā, āhārāyaṇiyāe
sāhū sāvae ya khāmei, micchukkaḍaṃ dāuṃ suhatavaṃ pucchei, suhapakkhiyaṃ ca sāhūṇameva pucchei, na sāvayāṇaṃ
tao jahāmaṃḍalīe ṭhāuṃ vaṃdaṇaṃ dāuṃ bhaṇai—‘devasiyaṃ āloiyaṃ paḍikkaṃtaṃ, pakkhiyaṃ paḍikkamāveha’ | tao
guruṇā—‘sammaṃ paḍikkamaha’tti bhaṇie, icchaṃti bhaṇiya, sāmāiyasuttaṃ ussaggasuttaṃ ca bhaṇiya, khamāsamaṇeṇa
‘pakkhiyasuttaṃ saṃdisāvemi’, puṇo khamāsamaṇeṇa ‘pakkhiyasuttaṃ kahemi’tti bhaṇittā, namokāratigaṃ kahiya paḍikkamaṇasuttaṃ bhaṇai | je ya suṇaṃti te ussaggasuttāṇaṃtaraṃ ‘tassuttarīkaraṇeṇaṃ’ti tidaṃḍagaṃ paḍhiya kāussagge
ṭhaṃti | suttasamattīe uḍḍhaṭṭhio navakāratigaṃ bhaṇiya, uvavisiya, namokkārasāmāiyatigapuvvaṃ ‘icchāmipaḍikkamiuṃ
jo me pakkhio aiyāro kao’ ityāidaṃḍagaṃ paḍhiya, suttaṃ bhaṇittā, uṭṭhiya ‘abbhuṭṭhiomi ārāhaṇāe’tti
daṃḍagaṃ paḍhittā, khamāsamaṇaṃ dāuṃ ‘mūlaguṇa-uttaraguṇa-aiyāravisohaṇatthaṃ karemi kāussaggaṃ’ti bhaṇiya,
‘karemi bhaṃte’ ityāi, ‘icchāmi ṭhāmi kāussagga’mityāidaṃḍayaṃ ca paḍhittā, kāussaggaṃ kāuṃ, vārasujjoe ciṃtei
tao pārittā, ujjoyaṃ bhaṇittā, muhapottiṃ paḍilehiya, vaṃdaṇaṃ dāuṃ, samattakhāmaṇaṃ kāuṃ, cauhiṃ chobhavaṃdaṇagehiṃ
tinni tinni namokkāre, bhūnihiyaśiro bhaṇei tti | tao devasiyasesaṃ paḍikkamai | navaraṃ suyadevayāthuiaṇaṃtaraṃ
bhavaṇadevayāe kāussagge namokkāraṃ ciṃtiya, tīse thuīṃ dei suṇei vā | thuttaṃ ca ajiyasaṃtitthao | evaṃ
cāummāsiya-saṃvacchariyā vi paḍikkamaṇā tadabhilāveṇa neyavvā | navaraṃ jattha pakkhie vārasujjoyā ciṃtijjaṃti,
tattha cāummāsie vīsaṃ, saṃvaccharie cālīsaṃ, paṃcamaṃgalaṃ ca | tahā pakkhie paṇagadasu jaisu tiṇhaṃ saṃbuddhakhāmaṇāṇaṃ, cāummāsie sattāisu paṃcaṇhaṃ, saṃvaccharie navāisu sattaṇhaṃ | dugamāīniyamā sese kujja tti
bhāvattho | tahā saṃvaccharie bhavaṇadevayākāussaggo na kīrai na ya thuī | asajjhāiyakāussaggo na kīrai
tahā ‘rāiya-devasiesu ‘icchāmo'ṇusaṭṭhiṃ’ti bhaṇaṇāṇaṃtaraṃ, guruṇā paḍhamathuīe bhaṇiyāe matthae aṃjaliṃ kāuṃ
‘namo khamāsamaṇāṇaṃ’ti bhaṇiya, matthae aṃjalipaggahamimaṃ vā kāuṃ iyare tinni thuīo bhaṇaṃti | pakkhie puṇa
niyamā guruṇā thuitige pūrie, tao sesā aṇukaḍḍaṃti tti
pakkhiyapaḍikkamaṇavihī