Vidhimargaprapa 40.3.2

40.3.2

gāmadvāre gāmo, gāmamajjhe maṃḍalaṃ, sāhīe kaṃḍaṃ, nivesaṇe deso, vasahīe pavisiya jai paḍai rajjaṃ mottavvaṃ
puṇo nijjūḍho jai bīyavelaṃ ei, to do rajjāṇi, taiyāe tinni, teṇa paraṃ bahuso vi iṃto tinni ceva | tahā
paṇayālīsamuhuttiesu nakkhattesu mayassa padikidī do dabbhamayā, dasiyāmayā vā pottalā kāyavvā | ee
te viijjayā iti | jai na kīraṃti to anne do kaḍḍhei | saṃthārage karisagāyāro kīrai | tattha uttarātigaṃ
puṇavvasu-rohiṇī-visāha tti cha nakkhattā paṇayālīsamuhuttā | puttalagāṇaṃ ca samīve raoharaṇaṃ muhapottī ya
ṭhavijjai | tahā tīsamuhuttiesu ikko kāyavvo | esa te viijja tti | tadakaraṇe egaṃ kaḍḍhei | tāṇi ya -
assiṇi-kittiya-migasira-pussā maha-phaggu-hattha-cittā ya
aṇurāha-mūlasāḍhā savaṇa-dhaṇiṭṭhā ya bhaddavayā
taha revai tti ee pannarasa havaṃti tīsaimuhuttā
tahā pannaramuhuttiesu abhiīmi ya na kāyavvo
sayabhisayā bharaṇīo addā-assesa-sāi-jiṭṭhā ya
ee chanakkhattā pannaramuhuttasaṃjogā
saṃdhiyagacaukkassa chagaṇamuṭṭha-kumārīsuttataṃtūṇa ya uttarāsaṃgeṇa tivayaṇeṇa rakkhākaraṇaṃ | taṃ ca apayāhiṇāvatteṇaṃ vāmamuyāhiṭṭheṇaṃ dakkhiṇakhaṃdhattovariṃ ca kāyavvaṃ | daṃḍadharo vāṇāyario sarāvasaṃpuḍe kesarāi
geṇhai, chagaṇacuṇṇaṃ vā | doṇhaṃ sāhūṇaṃ kappatippatthamasaṃsaṭṭhaṃ pāgagaṃ gahāya amugapaese āgaṃtavvaṃ ti saṃkeyadāṇaṃ | jo uṇa vasahīe ṭhāi tassa mayagasaṃtiyauccārapāsavaṇakhelamattavigiṃcaṇa-vasahipamajjaṇa-tahāvihapaesolliṃpaṇa-nirovadāṇaṃ, pacchā saghaṃ so pharei | paḍissayāo nīṇatehiṃ puvaṃ pāyā pacchā sīsaṃ nīṇeyavvaṃ