Vidhimargaprapa 7.3

7.3

dāuṃ bhaṇai–‘icchākāreṇa tumbhe amhaṃ sammattasāmāiya-suyasāmāiyasuttaṃ uccārāveha’ tti | gurū bhaṇai–
‘uccārāvemo’ | tao navakāratigaṃ bhaṇittu bāratigaṃ daṃḍagaṃ bhaṇāvei | jahā–‘ahaṃ ṇaṃ bhaṃte tumhāṇaṃ samīpe
micchattāo paḍikkamāmi; sammattaṃ uvasaṃpajjāmi | no me kappai ajjappabhii annatithie vā, annatithiyadevayāṇi vā, annatithiyapariggahiyāṇi arahaṃtaceiyāṇi vā; vaṃdittae vā, namaṃsittae vā, puvvi aṇālattaeṇaṃ ālavittae vā, saṃlavittae vā; tesiṃ asaṇaṃ vā, pāṇaṃ vā, khāimaṃ vā, sāimaṃ vā, dāuṃ vā
aṇuppayāuṃ vā, tesiṃ gaṃdhamallāiṃ peseuṃ vā, nannattha rāyābhiogeṇaṃ, gaṇābhiogeṇaṃ, balābhiogeṇaṃ, devayābhiogeṇaṃ, guruniggaheṇaṃ, vittīkaṃtāreṇaṃ;–taṃ ca cauvvihaṃ, taṃ jahā–davvao, khettao, kālao, bhāvao
tattha davvao–daṃsaṇadavvāiṃ ahigicca; khittao jāva bharahammi majjhimakhaṃḍe; kālao jāva jīvāe; bhāvao
jāva chaleṇaṃ na chalijjāmi, jāva sannivāeṇaṃ na mujjāmi, jāva keṇai ummāyavaseṇa eso me daṃsaṇapālaṇapariṇāmo na parivaḍai; tāva me eso daṃsaṇābhigaho tti’ || tao sīsassa sire vāse khivei | tao nisijjovaviṭṭho gurū sakalīkaraṇarakkhāmuddāpuvvayaṃ akkhae abhimaṃtiya uvariṃ paṇava(oṃ)–bhuvaṇesara(hrīṃ)–lacchī(śrīṃ)–arahaṃtabīyāiṃ hattheṇa lihittā, loguttamāṇa pāe sugaṃdhe khivittā, saṃghassa dei
paṃcaparamiṭṭhimuddā, surahī-sohagga-garuḍavajjā ya
bhuggarakarā ya sattao eyā akkhayapayāṇaṃ mi || [2]
§ 2. tao khamāsamaṇaṃ dāuṃ sāvao bhaṇai–‘icchākāreṇa tumbhe amhaṃ sammattasāmāiya-suyasāmāiyaṃ
āroveha’ | gurū bhaṇai–‘ārovemo’ | puṇo vaṃdiūṇa sīso bhaṇai–‘saṃdisaha kiṃ bhaṇāmo ?’ | gurū bhaṇai
‘vaṃdittā paveyaha’ | puṇo vaṃdiūṇa sīso bhaṇai–‘icchākāreṇa tumbhehiṃ amhaṃ sammattasāmāiya-suyasāmāiyaṃ āroviyaṃ !’ | evaṃ paṇhe kae gurū bhaṇai–‘āroviyaṃ’