Thanamga 4.3.13.2

4.3.13.2

caühiṁ ṭhāṇēhiṁ ahuṇōvavaṇṇē dēvē dēvalōēsu icchejja māṇusaṁ lōgaṁ havvamāgacchittaē sañcāēti havvamāgacchittaē taṁ jahā — (1)ahuṇōvavaṇṇē dēvē dēvalōgēsu divvēsu kāmabhōgēsu amucchitē agiddhē agaḍhitē aṇajjhōvavaṇṇē, tassa ṇaṁ ēvaṁ bhavati- atthi khalu mama māṇussaē bhavē āyariēti vā uvajjhāēti vā pavattīti vā thērēti vā gaṇīti vā gaṇadharēti gaṇāvacchēdēti vā jēsiṁ pabhāvēṇaṁ maē imā patārūvā divvā dēviḍḍhī divvā dēvajutī divvē dēvāṇubhāvē laddhē pattē abhisamaṇṇāgatē, taṁ gacchāmi ṇaṁ tē bhagavantē vandāmi namaṁsāmi sakkārēmi sammāṇēmi kallāṇaṁ maṅgalaṁ dēvayaṁ cēīyaṁ pajjuvāsāmi, (2)ahuṇōvavaṇṇē dēvē dēvalōēsu jāva aṇajjhōvavaṇṇē tassa ṇamēvaṁ bhavati- ēsa ṇaṁ māṇussaē bhavē nāṇīti vā tavassīti vā aïdukkara-dukkarakāragē, taṁ gacchāmi ṇaṁ tē bhagavantē vandāmi jāva pajjuvāsāmi, (3)ahuṇōvavaṇṇē dēvē dēvalōēsu jāva aṇajjhōvavaṇṇē tassa ṇamēva bhavati- atthi ṇaṁ mama māṇussaē bhavē mātāti vā jāva suṇhāti vā, taṁ gacchāmi ṇaṁ tēsimantiyaṁ pāubbhavāmi pāsantu tā mē imamētārūvaṁ divvaṁ dēviḍḍhiṁ divvaṁ dēvajuttiṁ divvaṁ dēvāṇubhāvaṁ laddhaṁ pattaṁ abhisamaṇṇāgataṁ, (4)ahuṇōvavaṇṇē dēvē dēvalōgēsu jāva aṇajjhōvavaṇṇē tassa ṇamēvaṁ bhavati- atthi ṇaṁ mama māṇussaē bhavē mittēti vā sahāti vā jāva sahāēti vā saṅgaïēti vā, tēsiṁ ca ṇaṁ amhē aṇṇamaṇṇassa saṅgārē paḍisutē bhavati, jō mē puvviṁ cayati sē sambōhētavvē iccētēhiṁ jāva sañcāēti havvamāgacchittaē.