Thanamga 4.3.2.1

4.3.2.1

cattāri pakkhī pannattā taṁ jahā — rutasampaṇṇē nāmamēgē nō ruvasampaṇṇē, ruvasampaṇṇē nāmamēgē nō rutasampaṇṇē, ēgē rutasampaṇṇēvi ruvasampaṇṇēvi, ēgē nō rutasampaṇṇē nō ruvasampaṇṇē; ēvāmēva cattāri purisajāyā pannattā taṁ jahā — rutasampaṇṇē nāmamēgē nō rūva sampaṇṇē-4; cattāri purisajāyā pannattā taṁ jahā — pattiyaṁ karēmītēgē pattiyaṁ karēti, pattiyaṁ karēmītēgē appattiyaṁ karēti, appattiyaṁ karēmītēgē pattiyaṁ karēti, appattiyaṁ karēmītēgē appattiyaṁ karēti; cattāri purisajāyā pannattā taṁ jahā — appaṇō nāmamēgē pattiyaṁ karēti nō parassa, parassa nāmamēgē pattiyaṁ karēti nō appaṇō, ēgē appaṇōvi pattiyaṁ karēti parassavi, ēgē nō appaṇō pattiyaṁ karēti nō parassa.