Viyahapannatti v5.p204

v5.p204

bāhirae poggale pariyāittā pabhū egaṃ mahaṃ itthirūvaṃ vā jāva saṃdamāniyarūvaṃ vā viuvvittae ?, haṃtā pabhū, anagāre ṇaṃ bhaṃte! bhāvi, kevatiyāiṃ pabhū itthirūvāiṃ vikuvvittae ?, goyamā ! se jahānāmae juvaī juvāṇe hattheṇaṃ hatthe geṇhejjā cakkassa vā nābhī aragā uttāsiyā evāmeva anagārevi bhāviyappā veuvviyasamugghāeṇaṃ samohaṇai jāva pabhūṇaṃ goyamā ! anagāreṇaṃ bhāviyappā kevalakappaṃ jaṃbūddīvaṃ bahuhaṃ itthīrūvehiṃ āinnaṃ vitikinnaṃ jāva esa ṇaṃ goyamā ! anagārassa bhāvi0 ayameyārūve visae visayamette vuccai no ceva ṇaṃ saṃpattīe vikuvviṃsu vā 3, evaṃ parivāḍie neyavvaṃ jāva saṃdamāniyā |
se jahānāmae kei purise asicammapāyaṃ gahāya gacchejjā evāmeva bhāviyappā anagāre vi asicammapāyahatthakiñccagaeṇaṃ appāṇeṇaṃ uḍḍuṃ vehāsaṃ uppaijjā ?, haṃtā uppaijjā, anagāre ṇaṃ bhaṃte ! bhāviyappā kevatiyāiṃ pabhū asicammapāyahatthakiñcagayāī ruvāī viuvvittae ?, goyamā ! se jahānāmae-juvatiṃ juvāṇe hattheṇaṃ hatthe geṇhejjā taṃ ceva jāva viuvviṃsu vā 3 |
se jahānāmae kei purise egaopaḍāgaṃ kāuṃ gacchejjā, evāmeva anagārevi bhāviyappā egaopaḍāgahatthakiñccagaeṇaṃ appāṇeṇaṃ uḍḍuṃ vehāsaṃ uppaejjā ? haṃtā goyamā ! uppaejjā, anagāre ṇaṃ bhaṃte! bhāviyappā kevatiyāiṃ pabhū egaopaḍāgāhatthakiccagayāī ruvāī vikubvittae ? evaṃ ceva jāva vikuvvisu vā 3 | evaṃ duhaopaḍāgaṃpi |
se jahānāmae- kei purise egaojaṃnovaitaṃ kāuṃ gacchejjā, evāmeva aṇa0 bhā0 egaojannovaiyakiñccagaeṇaṃ appāṇeṇaṃ uḍḍuṃ vehāsaṃ uppaejjā ? haṃtā ! uppaejjā, anagāre ṇaṃ bhaṃte bhāviyappā kevatiyāiṃ pabhū egaojaṇṇo vaiyakiñcagayāiṃ ruvāiṃ vikuvvittae taṃ ceva jāva vikuvviṃsu vā 3, evaṃ duhaojannovaiyaṃpi |
201
se jahānāmae kei purise egao palhatthiyaṃ kāuṃ ciṭṭhejā, evāmeva anagārevi bhāviyappā evaṃ ceva jāva vikuvvisu vā 3 evaṃ duhao paliyaṃkaṃ pi | anagāre ṇaṃ bhaṃte ! bhāviyappā bāhirae poggale apariyāittā pabhū egaṃ mahaṃ āsarūvaṃ vā hatthirūvaṃ vā sīharūvaṃ vā vagghavagadīviyaacchatarachaparāsararūvaṃ vā abhibhuṃjittae ?, no tiṇaṭṭe samaṭṭhe, anagāre ṇaṃ evaṃ bāhirae poggale pariyādittā pabhū | anagāre ṇaṃ bhaṃte! bhā0 evaṃ mahaṃ āsarūvaṃ vā abhibhuṃjittā anegāiṃ joyaṇāī gamittae ? haṃtā ! pabhū |
se bhaṃte! kiṃ āyaḍḍīe gacchati pariḍḍīe gacchati ?, goyamā ! āiḍḍīe gacchai no pariḍḍīe, evaṃ āyakammuṇā no parakammuṇā āyappaogeṇaṃ no parappaogeṇaṃ ussiodayaṃ vā gacchai payodagaṃ vā gacchai | se ṇaṃ bhaṃte ! kiṃ anagāre āse ? goyamā ! anagāre ṇaṃ se no khalu se āse, evaṃ jāva parāsararūvaṃ vā |
se bhaṃte! kiṃ māyī vikuvvati māyī vikuvvati ?, goyamā ! māyī vikuvvati no amāyī vikuvvati, māīṇaṃ bhaṃte! tassa ṭhāṇassa anāloiyapaḍikkaṃte kālaṃ karei kahiṃ uvavajjati ?, goyamā ! annayaresu ābhiyogesu devalogesu devattāe uvavajjai, amāī ṇaṃ tassa ṭhāṇassa āloiyapaḍikkaṃte kālaṃ karei kahiṃ uvavajjati ?, goyamā ! annayaresu aṇābhiogesu devalogesu devattāe uvavajjai, sevaṃ bhaṃte 2 tti |