Nayadhammakahao 1.2.7.4

1.2.7.4

imaṁ ca ṇaṁ vijaē takkarē rāyagihassa nagarassa bahūṇi aïgamaṇāṇi ya niggamaṇāṇi ya vārāṇi ya avavārāṇi ya tahēva jāva sunnagharāṇi ya ābhōēmāṇē maggēmāṇē gavēsamāṇē jēṇēva dēvadinnē dāraē tēṇēva uvāgacchaï uvāgacchittā dēvadinnaṁ dāragaṁ savvālaṅkāravibhūsiyaṁ pāsaï pāsittā dēvadinnassa dāragassa ābharaṇālaṅkārēsu mucchiē gaḍhiē giddhē ajjhōvavaṇṇē panthayaṁ dāsacēḍayaṁ pamattaṁ pāsaï pāsittā disālōyaṁ karēi karēttā dēvadinna dāragaṁ gēṇhaï gēṇhittā kakkhaṁsi alliyāvēi alliyāvēttā uttarijjēṇaṁ pihēi pihēttā sigghaṁ turiyaṁ cavalaṁ cēiyaṁ rāyagihassa nagarassa avaddārēṇaṁ niggacchaï niggacchittā jēṇēva jiṇṇujjāṇē jēṇēva bhaggakūvaē tēṇēva uvāgacchaï uvāgacchittā dēvadinnaṁ dārayaṁ jīviyāō vavarōvēi vavarōvēttā ābharaṇālaṅkāraṁ gēṇhaï gēṇhittā dēvadinnassa dāragassa sarīraṁ nippāṇaṁ niccēṭṭhaṁ jīvavippajaḍhaṁ bhaggakūvaē pakkhivaï pakkhivittā jēṇēva māluyākacchaē tēṇēva uvāgacchaï uvāgacchittā māluyākacchayaṁ anuppavisaï anuppavisittā niccalē nippandē tusiṇīē divasaṁ khavēmāṇē ciṭṭhaï.