Uvasagadasao 1.14

1.14

tae ṇaṃ tassa ānaṃdassa samaṇovāsagassa uccāvaehiṃ sīla-vvaya-guṇa-veramaṇa-paccakkhāṇa-posahovavāsehiṃ appāṇaṃ bhāvemāṇassa coddasa saṃvaccharāiṃ vīikkaṃtāiṃ| pannarasamassa saṃvaccharassa aṃtarā vaṭṭamāṇassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa imeyārūve ajjhatthie ciṃtie patthie manogae saṃkappe samuppajjitthā–evaṃ khalu ahaṃ vāṇiyagāme nayare bahūṇaṃ rāīsara-talavara-māḍaṃbiya-koḍuṃbiya-ibbha-seṭṭhi-senāvai-satthavāhāṇaṃ bahūsu kajjesu ya kāraṇesu ya kuḍuṃbesu ya maṃtesu ya gujjhesu ya rahassesu ya nicchaesu ya vavahāresu ya āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī pamāṇaṃ āhāre ālaṃbaṇaṃ cakkhū, meḍhībhūe pamāṇabhūe āhārabhūe ālaṃbaṇabhūe cakkhubhūe savvakajjavaḍḍhāvae, taṃ eteṇaṃ vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannatti uvasaṃpajjittā ṇaṃ viharittae|
taṃ seyaṃ khalu mamaṃ kallaṃ pāuppabhāyāe rayaṇīe phulluppalakamalakomalummiliyammi aha paṃḍure pahāe rattāsogappagāsa-kiṃsuya-suyamuha-guṃjaddharāgasarise kamalāgarasaṃḍabohae uṭṭhiyammi sūre sahassa-rassimmi dinayare teyasā jalaṃte vipulaṃ asana-pāna-khāima-sāimaṃ uvakkhaḍāvettā, mitta-nāi-niyaga-sayaṇa-saṃbaṃdhi-parijanaṃ āmaṃtettā, taṃ mitta-nāi-niyaga-sayaṇa-saṃbaṃdhi-parijanaṃ vipuleṇaṃ asana-pāna-khāima-sāimeṇaṃ vattha-gaṃdhamallālaṃkāreṇa ya sakkārettā sammāṇettā, tasseva mitta-nāi-niyaga-sayaṇa-saṃbaṃdhi-parijaṇassa purao jeṭṭhaputtaṃ kuḍuṃbe ṭhavettā, taṃ mitta-nāi-niyaga-sayaṇa-saṃbaṃdhi-parijanaṃ jeṭṭhaputtaṃ ca āpucchittā, kollāe sannivese nāyakulaṃsi posahasālaṃ paḍilehittā, samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharittae–
evaṃ saṃpehei, saṃpehettā kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte vipulaṃ asana-pāna-khāima-sāimaṃ uvakkhaḍāvei, uvakkhaḍāvettā mitta-nāi-niyaga-sayaṇa-saṃbaṃdhi-parijanaṃ āmaṃtei, āmaṃtettā tao pacchā ṇhāe kayabalikamme kayakouya-maṃgala-pāyacchitte suddhappāvesāiṃ maṃgallāiṃ vatthāiṃ pavara parihie appamahagghābharaṇālaṃkiyasarīre bhoyaṇavelāe bhoyaṇamaṃḍavaṃsi suhāsaṇavaragae, teṇaṃ mitta-nāi-niyaga-sayaṇa-saṃbaṃdhi-parijaṇeṇaṃ saddhiṃ taṃ vipulaṃ asana-pāna-khāima-sāimaṃ āsādemāṇe visādemāṇe paribhāemāṇe paribhuṃjemāṇe viharai|
jimiyabhuttuttarāgae ṇaṃ āyaṃte cokkhe paramasuibbhūe, taṃ mitta-nāi-niyaga-sayaṇa-saṃbaṃdhi-parijaṇaṃ vipuleṇaṃ asana-pāna-khāima-sāimeṇaṃ vattha-gaṃdhamallālaṃkāreṇa ya sakkārei sammāṇei, tasseva mitta-nāi-niyaga-sayaṇa-saṃbaṃdhi-parijaṇassa purao jeṭṭhaputtaṃ saddāvei, saddāvettā evaṃ vayāsī–
evaṃ khalu puttā! ahaṃ vāṇiyagāme nayare bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae, taṃ eteṇaṃ vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharittae| taṃ seyaṃ khalu mama idāṇiṃ tumaṃ sayassa kuḍuṃbassa meḍhiṃ pamāṇaṃ āhāraṃ ālaṃbaṇaṃ cakkhuṃ ṭhāvettā, taṃ mitta-nāi-niyaga-sayaṇa-saṃbaṃdhi-parijanaṃ tumaṃ ca āpucchittā kollāe sannivese nāya-kulaṃsi posahasālaṃ paḍilehittā samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharittae|
tae ṇaṃ se jeṭṭhaputte ānaṃdassa samaṇovāsagassa taha tti eyamaṭṭhaṃ vinaeṇaṃ paḍisuṇeti|
tae ṇaṃ se ānaṃde samaṇovāsae tasseva mitta-nāi-niyaga-sayaṇa-saṃbaṃdhi-parijaṇassa purao jeṭṭhaputtaṃ kuḍuṃbe ṭhāveti, ṭhāvettā evaṃ vayāsī–mā ṇaṃ devānuppiyā! tubbhe ajjappabhiiṃ kei mamaṃ bahūsu kajjesu ya kāraṇesu ya maṃtesu ya kuḍuṃbesu ya gujjhesu ya rahassesu ya nicchaesu ya vavahāresu ya āpucchau vā paḍipucchau vā, mamaṃ aṭṭhāe asanaṃ vā pānaṃ vā khāimaṃ vā sāimaṃ vā uvakkhaḍeu vā uvakkareu vā|
tae ṇaṃ se ānaṃde samaṇovāsae jeṭṭhaputtaṃ mitta-nāi-niyaga-sayaṇa-saṃbaṃdhi-parijaṇaṃ ca āpucchai, āpucchittā sayāo gihāo paḍinikkhamai, paḍinikkhamittā vāṇiyagāmaṃ nayaraṃ majjhaṃmajjheṇaṃ niggacchai, niggacchittā jeṇeva kollāe sannivese, jeṇeva nāyakule, jeṇeva posahasālā, teṇeva uvāgacchai, uvāgacchittā posahasālaṃ pamajjai, pamajjittā uccāra-pāsavaṇabhūmiṃ paḍilehei, paḍi-lehettā dabbhasaṃthārayaṃ saṃtharei, saṃtharettā dabbhasaṃthārayaṃ duruhai, duruhittā posahasālāe posahie baṃbhayārī ummukkamaṇisuvaṇṇe vavagayamālāvaṇṇagavilevaṇe nikkhittasatthamusale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai|