Uvasagadasao 1.13

1.13

tae ṇaṃ se ānaṃde samaṇovāsae jāe–abhigayajīvājīve uvaladdhapuṇṇapāve āsava-saṃvara-nijjara-kiriyā-ahigaraṇa-baṃdhamokkhakusale asahejje, devāsura-nāga-suvaṇṇa-jakkha-rakkhasa-kinnara-kiṃpurisa-garula-gaṃdhavva-mahoragāiehiṃ devagaṇehiṃ niggaṃthāo pāvayaṇāo aṇaikkamaṇijje, niggaṃthe pāvayaṇe nissaṃkie nikkhaṃkhie nivvitigicche laddhaṭṭhe gahiyaṭṭhe pucchiyaṭṭhe abhigayaṭṭhe vinicchiyaṭṭhe aṭṭhimiṃjapemāṇurāgaratte, ayamāuso! niggaṃthe pāvayaṇe aṭṭhe ayaṃ paramaṭṭhe sese aṇaṭṭhe ūsiyaphalihe avaṃguyaduvāre ciya-taṃteura-paragharadāra-ppavese cāuddasaṭṭhamuddaṭṭhapuṇṇamāsiṇīsu paḍipuṇṇaṃ posahaṃ sammaṃ anupālettā samaṇe niggaṃthe phāsuesaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇaṃ ya pīḍha-phalaga-sejjā-saṃthāraeṇaṃ paḍilābhemāṇe viharai|
tae ṇaṃ sā sivānaṃdā bhāriyā samaṇovāsiyā jāyā–abhigayajīvājīvā uvaladdhapuṇṇapāvā āsava-saṃvara-nijjara-kiriyā-ahigaraṇa-baṃdhamokkhakusalā asahejjā, devāsura-nāga-suvaṇṇa-jakkha-rakkhasa-kinnara-kiṃpurisa-garula-gaṃdhavva-mahoragāiehiṃ devagaṇehiṃ niggaṃthāo pāvayaṇāo aṇaikkamaṇijjā, niggaṃthe pāvayaṇe nissaṃkiyā nikkaṃkhiyā nivvitigicchā laddhaṭṭhā gahiyaṭṭhā pucchiyaṭṭhā abhigayaṭṭhā vinicchiyaṭṭhā aṭṭhimiṃjapemāṇurāgarattā, ayamāuso! niggaṃthe pāvayaṇe aṭṭhe ayaṃ paramaṭṭhe sese aṇaṭṭhe ūsiya-phalihā avaṃguyaduvārā ciyattaṃteura-paragharadāra-ppavesā cāuddasaṭṭhamuddiṭṭha-puṇṇamāsiṇīsu paḍipuṇṇaṃ posahaṃ sammaṃ aṇupālettā samaṇe niggaṃthe phāsu-esaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃthāraeṇaṃ paḍilābhemāṇī viharai|