Uvasagadasao 1.16

1.16

tae ṇaṃ se ānaṃde samaṇovāsae imeṇaṃ eyārūveṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe|
tae ṇaṃ tassa ānaṃdassa samaṇovāsagassa annadā kadāi puvvarattāvarattakālasamayaṃsi dhamma-jāgariyaṃ jāgaramāṇassa ayaṃ ajjhatthie ciṃtie patthie manogae saṃkappe samuppajjitthā–
evaṃ khalu ahaṃ imeṇaṃ eyārūveṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhammaṇisaṃtae jāe|
taṃ atthi tā me uṭṭhāṇe kamme bale vīrie purisakkāra-parakkame saddhā-dhii-saṃvege, taṃ jāvatā me atthi uṭṭhāṇe kamme bale vīrie purisakkāra-parakkame saddhā-dhii-saṃvege, jāva ya me dhammāyarie dhammovaesae samaṇe bhagavaṃ mahāvīre jiṇe suhatthī viharai, tāvatā me seyaṃ kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā-jalaṃte apacchimamāraṇaṃtiyasaṃlehaṇājjhūsaṇā-jjhūsiyassa bhattapāṇapaḍiyāikkhiyassa, kālaṃ aṇavakaṃkhamāṇassa viharittae–
evaṃ saṃpehei, saṃpehettā kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiya saṃlehaṇā-jjhūsaṇā-jjhūsie bhattapāna-paḍiyāikkhie kālaṃ anavakaṃkhamāṇe viharai|
tae ṇaṃ tassa ānaṃdassa samaṇovāsagassa annadā kadāi subheṇaṃ ajjhavasāṇeṇaṃ, subheṇaṃ pariṇāmeṇaṃ, lesāhiṃ visujjhamāṇīhiṃ, tadāvaraṇijjāṇaṃ kammāṇaṃ khaovasameṇaṃ ohināṇe samuppanne–puratthime ṇaṃ lavaṇasamudde paṃcajoyaṇasayāiṃ khettaṃ jāṇai pāsai| dakkhiṇe ṇaṃ lavaṇasamudde paṃcajoyaṇa-sayāiṃ khettaṃ jāṇai pāsai| paccatthime ṇaṃ lavaṇasamudde paṃcajoyaṇasayāiṃ khetta jāṇai pāsai| uttare ṇaṃ jāva cullahimavaṃtaṃ vāsadharapavvayaṃ jāṇai pāsai| uḍḍhaṃ jāva sohammaṃ kappaṃ jāṇai pāsai| ahe jāva imīse rayaṇa ppabhāe puḍhavīe loluyaccutaṃ narayaṃ caurāsītivāsasahassaṭṭhitiyaṃ jāṇai pāsai|