Uvasagadasao 1.17

1.17

teṇaṃ kāleṇaṃ teṇaṃ samaeṇaṃ bhagavaṃ mahāvīre samosarie|
parisā niggayā jāva paḍigayā|
teṇaṃ kāleṇaṃ teṇaṃ samaeṇaṃ samaṇassa bhagavao mahāvīrassa jeṭṭhe aṃtevāsī iṃdabhūī nāmaṃ anagāre goyamasagotte ṇaṃ sattussehe samacauraṃsasaṃṭhāṇasaṃṭhie vajjarisahanārāyasaṃghayaṇe kanagapulaganighasa- pamhagore uggatave dittatave tattatave mahātave orāle ghore ghoraguṇe ghoratavassī ghorabaṃbhaceravāsī ucchūḍhasarīre saṃkhittaviulateyalesse chaṭṭhaṃchaṭṭheṇaṃ anikkhitteṇaṃ tavokammeṇaṃ saṃjameṇaṃ tavasā appāṇaṃ bhāvemāṇe viharai|
tae ṇaṃ se bhagavaṃ goyame chaṭṭhakkhamaṇapāraṇagaṃsi paḍhamāe porisīe sajjhāyaṃ karei, biiyāe porisīe jjhāṇaṃ jjhiyāi, taiyāe porisīe aturiyamacavalamasaṃbhaṃte muhapottiyaṃ paḍilehei, paḍilehettā bhāyaṇavatthāiṃ, paḍilehei paḍilehettā bhāyaṇāiṃ pamajjai, pamajjittā bhāyaṇāiṃ uggāhei, uggāhettā jeṇeva samaṇe bhagavaṃ mahāvīre, teṇeva uvāgacchai, uvāgacchittā samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā evaṃ vayāsī–
icchāmi ṇaṃ bhaṃte! tubbhehiṃ abbhaṇuṇṇāe samāṇe chaṭṭhakkhamaṇa-pāraṇagaṃsi vāṇiyagāme nayare ucca-nīca-majjhimāiṃ kulāiṃ gharasamudānassa bhikkhāyariyāe aḍittae|
ahāsuhaṃ devānuppiyā! mā paḍibaṃdhaṃ kareha|
tae ṇaṃ bhagavaṃ goyame samaṇeṇaṃ bhagavayā mahāvīreṇaṃ abbhaṇuṇṇāe samāṇe samaṇassa bhagavao mahāvīrassa aṃtiyāo dūipalāsāo ceiyāo paḍinikkhamai, paḍinikkhamittā aturiyamacavalama-saṃbhaṃte jugaṃtarapaloyaṇāe diṭṭhīe purao riyaṃ sohemāṇe-sohemāṇe jeṇeva vāṇiyagāme nayare, teṇeva uvāgacchai, uvāgacchittā vāṇiyagāme nayare ucca-nīya-majjhimāiṃ kulāiṃ gharasamudānassa bhikkhā-yariyaṃ aḍai|
tae ṇaṃ se bhagavaṃ goyame vāṇiyagāme nayare ucca-nīya-majjhimāiṃ kulāiṃ gharasamudānassa bhikkhāyariyāe aḍamāṇe ahāpajjattaṃ bhattapāṇaṃ paḍiggāhei, paḍiggāhettā vāṇiyagāmāo nayarāo paḍiniggacchai, paḍiniggacchittā kollāyassa sannivesassa adūrasāmaṃteṇaṃ vīīvayamāṇe bahujanasaddaṃ nisāmei| bahujano annamannassa evamāikkhai, evaṃ bhāsai, evaṃ pannavei, evaṃ parūvei–
evaṃ khalu devānuppiyā! samaṇassa bhagavao mahāvīrassa aṃtevāsī ānaṃde nāmaṃ samaṇovāsae posahasālāe apacchima māraṇaṃtiya-saṃlehaṇā-jjhūsaṇā-jjhūsie, bhattapāṇapaḍiyāikkhie kālaṃ aṇavakaṃkhamāṇe viharai|
tae ṇaṃ tassa goyamassa bahujanassa aṃtie eyamaṭṭhaṃ soccā nisamma ayameyārūve ajjhatthie ciṃtie patthie manogae saṃkappe samuppajjitthā–taṃ gacchāmi ṇaṃ ānaṃdaṃ samaṇovāsayaṃ pāsāmi–evaṃ saṃpehei, saṃpehettā jeṇeva kollāe sannivese jeṇeva posahasālā, jeṇeva ānaṃde samaṇovāsae, teṇeva uvāgacchai|
tae ṇaṃ se ānaṃde samaṇovāsae bhagavaṃ goyamaṃ ejjamāṇaṃ pāsai, pāsittā haṭṭhatuṭṭha-cittamāṇaṃdie pīimaṇe paramasomaṇassie harisavasa-visappamāṇahiyae bhagavaṃ goyamaṃ vaṃdai namaṃsai, vaṃdittā namaṃsittā evaṃ vayāsī–
evaṃ khalu bhaṃte! ahaṃ imeṇaṃ orāleṇaṃ viuleṇaṃ payatteṇa paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe no saṃcāemi devānuppiyassa aṃtiyaṃ pāubbhavittā ṇaṃ tikkhutto muddhāṇeṇaṃ pādesu abhivaṃdittae| tubbhe ṇaṃ bhaṃte! icchākāreṇaṃ anabhioeṇaṃ io ceva eha, jeṇaṃ devānuppiyāṇaṃ tikkhutto muddhāṇeṇaṃ pādesu vaṃdāmi namaṃsāmi|
tae ṇaṃ se bhagavaṃ goyame jeṇeva ānaṃde samaṇovāsae, teṇeva uvāgacchai|