Uvasagadasao 1.2

1.2

teṇaṃ kāleṇaṃ teṇaṃ samaeṇaṃ samaṇassa bhagavao mahāvīrassa aṃtevāsī ajjasuhamme nāmaṃ there jātisaṃpanne kulasaṃpanne balasaṃpanne rūvasaṃpanne vinayasaṃpanne nāṇasaṃpanne daṃsaṇasaṃpanne carittasaṃpanne lajjāsaṃpanne lāghavasaṃpanne oyaṃsī teyaṃsī vaccaṃsī jasaṃsī jiyakohe jiyamāne jiyamāe jiyalohe jiyanidde jiiṃdie jiyaparīsahe jīviyāsamaraṇabhayavippamukke tavappahāṇe guṇappahāṇe karaṇappahāṇe caraṇappahāṇe niggahappahāṇe nicchayappahāṇe ajjavappahāṇe maddavappahāṇe lāghavappahāṇe khaṃtippahāṇe guttippahāṇe muttippahāṇe vijjappahāṇe maṃtappahāṇe baṃbhappahāṇe veyappahāṇe nayappahāṇe niyamappahāṇe saccappahāṇe soyappahāṇe nāṇappahāṇe daṃsaṇappahāṇe carittappahāṇe orāle ghore ghoraguṇe ghoratavassī ghorabaṃbhaceravāsī ucchūḍhasarīre saṃkhittaviulateyalesse caudasapuvvī caunāṇovagae paṃcahiṃ anagāra-saehiṃ saddhiṃ saṃparivuḍe puvvāṇupuvviṃ caramāṇe gāmāṇugāmaṃ dūijjamāṇe suhaṃsuheṇaṃ viharamāṇe jeṇeva caṃpā nayarī jeṇeva puṇṇabhadde ceie teṇeva uvāgacchai, caṃpānayarīe bahiyā puṇṇabhadde ceie ahāpaḍirūvaṃ oggahaṃ ogiṇhai, ogiṇhittā saṃjameṇaṃ tavasā appāṇaṃ bhāvemāṇe viharai|
teṇaṃ kāleṇaṃ teṇaṃ samaeṇaṃ ajjasuhammassa therassa jeṭṭhe aṃtevāsī ajjajaṃbū nāmaṃ anagāre kāsava gotteṇaṃ sattussehe sama cauraṃsasaṃṭhāṇasaṃṭhie vairarisahanārāyasaṃghayaṇe kanagapulaganighasapamhagore uggatave dittatave tattatave mahātave orāle ghore ghoraguṇe ghora tavassī ghorabaṃbhaceravāsī ucchūḍhasarīre saṃkhittaviulateyalesse ajjasuhammassa therassa adūrasāmaṃte uḍḍhaṃjāṇū ahosire jjhāṇakoṭṭhovagae saṃjameṇaṃ tavasā appāṇaṃ bhāvemāṇe viharai|
tae ṇaṃ se ajjajaṃbū nāmaṃ anagāre jāyasaḍḍhe jāyasaṃsae jāyakoūhalle, uppannasaḍḍhe uppanna-saṃsae uppannakoūhalle saṃjāyasaḍḍhe saṃjāyasaṃsae saṃjāyakoūhalle, samuppannasaḍḍhe samuppannasaṃsae samuppannakoūhalle uṭṭhāe uṭṭhei, uṭṭhettā jeṇeva ajjasuhamme there teṇeva uvāgacchai, uvāgacchittā ajjasuhammaṃ theraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā naccāsaṇṇe nāidūre sussūsamāṇe namaṃsamāṇe abhimuhe vinaeṇaṃ paṃjaliuḍe pajjuvāsamāṇaṃ evaṃ vayāsī–jai ṇaṃ bhaṃte! samaṇeṇaṃ bhagavayā mahāvīreṇaṃ jāva saṃpatteṇaṃ chaṭṭhassa aṃgassa nāyādhammakahāṇaṃ ayamaṭṭhe pannatte, sattamassa ṇaṃ bhaṃte! aṃgassa uvāsagadasāṇaṃ samaṇeṇaṃ bhagavayā mahāvīreṇaṃ jāva saṃpatteṇaṃ ke aṭṭhe pannatte?
evaṃ khalu jaṃbū! samaṇeṇaṃ bhagavayā mahāvīreṇaṃ jāva saṃpatteṇaṃ sattamassa aṃgassa uvāsagadasāṇaṃ dasaṃ ajjhayaṇā pannattā taṃ jahā–