Uvasagadasao 1.7

1.7

tae ṇaṃ se ānaṃde gāhāvaī samaṇassa bhagavao mahāvīrassa aṃtie dhammaṃ soccā nisamma haṭṭhatuṭṭha-cittamāṇaṃdie pīimaṇe paramasomaṇassie harisavasavisappamāṇahiyae uṭṭhāe uṭṭhei, uṭṭhettā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā evaṃ vayāsī–
saddahāmi ṇaṃ bhaṃte! niggaṃthaṃ pāvayaṇaṃ, pattiyāmi ṇaṃ bhaṃte! niggaṃthaṃ pāvayaṇaṃ, roemi ṇaṃ bhaṃte! niggaṃthaṃ pāvayaṇaṃ, abbhuṭṭhemi ṇaṃ bhaṃte! niggaṃthaṃ pāvayaṇaṃ| evameyaṃ bhaṃte! tahameyaṃ bhaṃte! avitahameyaṃ bhaṃte! asaṃdiddha meyaṃ bhaṃte! icchiyameyaṃ bhaṃte! paḍicchiyameyaṃ bhaṃte! icchiyapaḍicchiyameyaṃ bhaṃte! jaheyaṃ tubbhe vadaha|
jahā ṇaṃ devānuppiyāṇaṃ aṃtie bahave rāīsara-talavara-māḍaṃbiya-koḍuṃbiya-ibbha-seṭṭhi- -satthavāhappabhiiyā muṃḍā bhavittā agārāo anagāriyaṃ pavvaiyā, no khalu ahaṃ tahā saṃcāemi muṃḍe bhavittā agārāo anagāriyaṃ pavvaittae| ahaṃ ṇaṃ devānuppiyāṇaṃ atie paṃcāṇuvvaiyaṃ sattasikkhā-vaiyaṃ–duvālasavihaṃ sāvagadhammaṃ paḍivajjissāmi|
ahāsuhaṃ devānuppiyā! mā paḍibaṃdhaṃ karehi|