Uvasagadasao 1.8

1.8

tae ṇaṃ se ānaṃde gāhāvaī samaṇassa bhagavao mahāvīrassa aṃtie tappaḍhamayāe thūlayaṃ pāṇāivāyaṃ paccakkhāi jāvajjīvāe duvihaṃ tiviheṇaṃ–na karemi na kāravemi, manasā vayasā kāyasā|
tayānaṃtaraṃ ca ṇaṃ thūlayaṃ musāvāyaṃ paccakkhāi jāvajjīvāe duvihaṃ tiviheṇaṃ–na karemi na kāravemi, manasā vayasā kāyasā|
tayānaṃtaraṃ ca ṇaṃ thūlayaṃ adiṇṇādāṇaṃ paccakkhāi jāvajjīvāe duvihaṃ tiviheṇaṃ–na karemi na kāravemi, manasā vayasā kāyasā|
tayānaṃtaraṃ ca ṇaṃ sadārasaṃtosīe parimāṇaṃ karei–nannattha ekkāe sivanaṃdāe bhāriyāe, avasesaṃ savvaṃ mehuṇavihiṃ paccakkhāi|
tayānaṃtaraṃ ca ṇaṃ icchāparimāṇaṃ karemāṇe–
(1) hiraṇṇa-suvaṇṇavihiparimāṇaṃ karei–nannattha cauhiṃ hiraṇṇakoḍīhiṃ nihāṇapauttāhiṃ, cauhiṃ vaḍḍhipauttāhiṃ, cauhiṃ pavitthara-pauttāhiṃ, avasesaṃ savvaṃ hiraṇṇa-suvaṇṇavihiṃ paccakkhāi|
(2) tayānaṃtaraṃ ca ṇaṃ cauppayavihiparimāṇaṃ karei–nannattha cauhiṃ vaehiṃ dasagosāhassieṇaṃ vaeṇaṃ, avasesaṃ savvaṃ cauppayavihiṃ paccakkhāi|
(3) tayānaṃtaraṃ ca ṇaṃ khetta-vatthuvihiparimāṇaṃ karei–nannattha paṃcahiṃ elasaehiṃ niyattaṇasatieṇaṃ haleṇaṃ, avasesaṃ savvaṃ khetta-vatthu vihiṃ paccakkhāi|
(4) tayānaṃtaraṃ ca ṇaṃ sagaḍavihiparimāṇaṃ karei–nannattha paṃcahiṃ sagaḍasaehiṃ disāyattiehiṃ, paṃcahiṃ sagaḍasaehiṃ saṃvahaṇiehiṃ, avasesaṃ savvaṃ sagaḍavihiṃ paccakkhāi|
(5) tayānaṃtaraṃ ca ṇaṃ vāhaṇavihiparimāṇaṃ karei–nannattha cauhiṃ vāhaṇehiṃ disāyattiehiṃ, cauhiṃ vāhaṇehiṃ saṃvahaṇiehiṃ, avasesaṃ savvaṃ vāhanavihiṃ paccakkhāi|
tayānaṃtaraṃ ca ṇaṃ uvabhoga-paribhogavihiṃ paccakkhāyamāṇe–
(1) ullaṇiyāvihiparimāṇaṃ karei–nannattha egāe gaṃdhakāsāīe, avasesaṃ savvaṃ ullaṇiyāvihiṃ paccakkhāi|
(2) tayānaṃtaraṃ ca ṇaṃ daṃtavaṇavihiparimāṇaṃ karei–nannattha egeṇaṃ allalaṭṭhīmahueṇaṃ, avasesaṃ savvaṃ daṃtavaṇavihiṃ paccakkhāi|
(3) tayānaṃtaraṃ ca ṇaṃ phalavihiparimāṇaṃ karei–nannattha egeṇaṃ khīrāmalaeṇaṃ, avasesaṃ savvaṃ phalavihiṃ paccakkhāi|
(4) tayānaṃtaraṃ ca ṇaṃ abbhaṃgaṇavihiparimāṇaṃ karei–nannattha sayapāgasahassapāgehiṃ tellehiṃ, avasesaṃ savvaṃ abbhaṃgaṇavihiṃ paccakkhāi|
(5) tayānaṃtaraṃ ca ṇaṃ uvvaṭṭaṇāvihiparimāṇaṃ karei–nannattha egeṇaṃ surabhiṇā gaṃdhaṭṭaeṇaṃ, avasesaṃ savvaṃ uvvaṭṭaṇāvihiṃ paccakkhāi|
(6) tayānaṃtaraṃ ca ṇaṃ majjaṇavihiparimāṇaṃ karei–nannattha aṭṭhahiṃ uṭṭiehiṃ udagassa ghaḍehiṃ, avasesaṃ savvaṃ majjanavihiṃ paccakkhāi|
(7) tayānaṃtaraṃ ca ṇaṃ vatthavihiparimāṇaṃ karei– nannattha egeṇaṃ khomajuyaleṇaṃ, avasesaṃ savvaṃ vatthavihiṃ paccakkhāi|
(8) tayānaṃtaraṃ ca ṇaṃ vilevaṇavihiparimāṇaṃ karei–nannattha agaru-kuṃkuma-caṃdanamādiehiṃ, avasesaṃ savvaṃ vilevanavihiṃ paccakkhāi|
(9) tayānaṃtaraṃ ca ṇaṃ pupphavihiparimāṇaṃ karei–nannattha egeṇaṃ suddhapaumeṇaṃ mālaikusumadāmeṇa vā, avasesaṃ savvaṃ pupphavihiṃ paccakkhāi|
(10) tayānaṃtaraṃ ca ṇaṃ ābharaṇavihiparimāṇaṃ karei–nannattha maṭṭhakaṇṇejjaehiṃ nāmamuddāe ya, avasesaṃ savvaṃ ābharaṇavihiṃ paccakkhāi|
(11) tayānaṃtaraṃ ca ṇaṃ dhūvaṇavihiparimāṇaṃ karei–nannattha agaru-turukka-dhūvamādiehiṃ, avasesaṃ savvaṃ dhūvaṇavihiṃ paccakkhāi|
(12) tayānaṃtaraṃ ca ṇaṃ bhoyaṇavihiparimāṇaṃ karemāṇe–
(ka) pejja-vihiparimāṇaṃ karei–nannattha egāe kaṭṭhapejjāe, avasesaṃ savvaṃ pejjavihiṃ paccakkhāi|
(kha) tayānaṃtaraṃ ca ṇaṃ bhakkhavihiparimāṇaṃ karei–nannattha egehiṃ ghayapuṇṇehiṃ khaṃḍakhajjaehiṃ vā, avasesaṃ savvaṃ bhakkhavihiṃ paccakkhāi|
(ga) tayānaṃtaraṃ ca ṇaṃ odanavihiparimāṇaṃ karei–nannattha kalamasāliodaṇeṇaṃ, avasesaṃ savvaṃ odanavihiṃ paccakkhāi|
(gha) tayānaṃtaraṃ ca sūvavihiparimāṇaṃ karei–nannattha kalāyasūveṇa vā muggasūveṇa vā māsasūveṇa vā avasesaṃ savvaṃ sūvavihiṃ paccakkhāi|
(ṅa) tayānaṃtaraṃ ca ṇaṃ ghayavihiparimāṇaṃ karei–nannattha sāradieṇaṃ goghayamaṃḍeṇaṃ, avasesaṃ savvaṃ ghayavihiṃ paccakkhāi|
(ca) tayānaṃtaraṃ ca ṇaṃ sāgavihiparimāṇaṃ karei–nannattha vatthusāeṇa vā tuṃbasāeṇa vā sutthisāeṇa vā maṃḍukkiyasāeṇa vā, ava-sesaṃ savvaṃ sogavihiṃ paccakkhāi|
(cha) tayānaṃtaraṃ ca ṇaṃ māhurayavihiparimāṇaṃ karei–nannattha egeṇaṃ pālaṃkāmāhuraeṇaṃ, avasesaṃ savvaṃ māhurayavihiṃ paccakkhāi|
(ja) tayānaṃtaraṃ ca ṇaṃ temaṇavihiparimāṇaṃ karei–nannattha sehaṃbadāliyaṃbehiṃ, avasesaṃ savvaṃ temaṇavihiṃ paccakkhāi|
(jha) tayānaṃtaraṃ ca ṇaṃ pāṇiyavihiparimāṇaṃ karei–nannattha egeṇaṃ aṃtalikkhodaeṇaṃ, avasesaṃ savvaṃ pāṇiyavihiṃ paccakkhāi|
(ña) tayānaṃtaraṃ ca ṇaṃ muhavāsavihiparimāṇaṃ karei–nannattha paṃcasogaṃdhieṇaṃ taṃboleṇaṃ, avasesaṃ savvaṃ muhavāsavihiṃ paccakkhāi|
tayānaṃtaraṃ ca ṇaṃ cauvvihaṃ anaṭṭhādaṃḍaṃ paccakkhāi, taṃ jahā–1. avajjhāṇācarittaṃ, 2. pamāyācarittaṃ, 3. hiṃsappayāṇaṃ, 4. pāvakammovadese|