Uvasagadasao 2.21

2.21

tae ṇaṃ tassa kāmadevassa samaṇovāsagassa puvvarattāvarattakālasamayaṃsi ege deve māyī micchadiṭṭhī aṃtiyaṃ āubbhūe|
tae ṇaṃ se deve egaṃ mahaṃ pisāyarūvaṃ viuvvai| tassa ṇaṃ divvassa pisāyarūvassa ime eyārūve vaṇṇāvāse pannatte–sīsaṃ se gokilaṃja-saṃṭhāṇa-saṃṭhiyaṃ, sālibhasella-sarisā se kesā kavilateeṇaṃ dippamāṇā, uṭṭiyā-kabhalla-saṃṭhāṇa-saṃṭhiyaṃ niḍālaṃ muguṃsapucchaṃ va tassa bhumakāo phuggaphuggāo vigaya-bībhatsa-daṃsaṇāo, sīsaghaḍiviṇiggayāiṃ acchīṇi vigaya-bībhatsa-daṃsaṇāiṃ, kaṇṇā jaha suppa-kattaraṃ ceva vigaya-bībhatsa-daṃsaṇijjā, urabbhapuḍasaṃnibhā se nāsā, jjhusirā jamala-cullī-saṃṭhāṇa-saṃṭhiyā do vi tassa nāsāpuḍayā, ghoḍayapucchaṃ va tassa maṃsūiṃ kavila-kavilāiṃ vigaya-bībhatsa-daṃsaṇāiṃ, uṭṭhā uṭṭassa ceva laṃbā, phālasarisā se daṃtā, jibbhā jaha suppakattaraṃ ceva vigaya-bībhatsa-daṃsaṇijjā, hala-kuḍḍāla-saṃṭhiyā se haṇuyā, gallakaḍillaṃ va tassa khaḍḍaṃ phuṭṭaṃ kavilaṃ pharusaṃ mahallaṃ, muiṃgākārovame se khaṃdhe, puravarakavāḍovame se vacche, koṭṭhiyā-saṃṭhāṇa-saṃṭhiyā do vi tassa bāhā, nisāpāhāṇa-saṃṭhāṇa-saṃṭhiyā do vi tassa aggahatthā, nisāloḍha-saṃṭhāṇa-saṃṭhiyāo hatthesu aṃgulīo, sippipuḍagasaṃṭhiyā se nakhā, ṇhāviyapasevao vva urammi laṃbaṃti do vi tassa thaṇayā, poṭṭaṃ ayakoṭṭhao vva vaṭṭaṃ, pāna-kalaṃda-sarisā se nāhī, sikkaga-saṃṭhāṇa-saṃṭhie se nette, kiṇṇapuḍa-saṃṭhāṇa-saṃṭhiyā do vi tassa vasaṇā, jamala-koṭṭhiyā-saṃṭhāṇa-saṃṭhiyā do vi tassa urū, ajjuṇa-guṭṭhaṃ va tassa jāṇūiṃ kuḍila-kuḍilāiṃ vigaya-bībhatsa-daṃsaṇāiṃ, jaṃghāo kakkhaḍīo lomehiṃ uvaciyāo, aharī-saṃṭhāṇa-saṃṭhiyā do vi tassa pāyā, aharī-loḍha-saṃṭhāṇa-saṃṭhiyāo pāesu aṃgulīo, sippipuḍasaṃṭhiyā se nakhā|
laḍaha-maḍaha-jāṇue, vigaya-bhagga-bhugga-bhumae, avadāliya-vayaṇa-vivara-nillāliyaggajāhe, saraḍa-kayamāliyāe uṃduramālā-pariṇaddha-sukayaciṃdhaṃ, naula-kayakaṇṇapūre, sappa-kayavegacche, appho-ḍaṃte, abhigajjaṃte, bhīma-mukkaṭṭahāse, nānāviha-paṃcavaṇṇehiṃ lomehiṃ uvacie egaṃ mahaṃ nīluppala-gavalaguliya-ayasikusumappagāsaṃ khuradhāra asiṃ gahāya jeṇeva posahasālā, jeṇeva kāmadeve samaṇovāsae, teṇeva uvāgacchai, uvāgacchittā āsuratte ruṭṭhe kuvie caṃḍikkie misimisīyamāṇe kāmadevaṃ samaṇovāsayaṃ evaṃ vayāsī–
haṃbho! kāmadevā! samaṇovāsayā! appatthiyapatthiyā! duraṃta-paṃta-lakkhaṇā! hīnapuṇṇacāu-ddasiyā! siri-hiri-dhii-kitti-parivajjiyā! dhammakāmayā! puṇṇakāmayā! saggakāmayā! mokkha-kāmayā! dhammakaṃkhiyā! puṇṇakaṃkhiyā! saggakaṃkhiyā! mokkhakaṃkhiyā! dhammapivāsiyā! puṇṇa-pivāsiyā! saggapivāsiyā! mokkhapivāsiyā! no khalu kappai tava devānuppiyā! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ cālittae vā khobhittae vā khaṃḍittae vā bhaṃjittae vā ujjhittae vā pariccaittae vā, taṃ jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posaho-vavāsāiṃ na chaḍḍesi na bhaṃjesi, to taṃ ahaṃ ajja imeṇaṃ nīluppala-gavalaguliya-ayasikusumappagāseṇa khuradhāreṇa asiṇā khaṃḍākhaṃḍi karemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se kāmadeve samaṇovāsae teṇaṃ divveṇaṃ pisāyarūveṇaṃ evaṃ vutte samāṇe abhīe atatthe anuvvigge akhubhie acalie asaṃbhaṃte tusiṇīe dhammajjhāṇovagae viharai|