Uvasagadasao 2.22

2.22

tae ṇaṃ se divve pisāyarūve kāmadevaṃ samaṇovāsayaṃ abhīyaṃ atatthaṃ aṇuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā doccaṃ pi taccaṃ pi kāmadevaṃ samaṇovāsayaṃ evaṃ vayāsī–haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ, paccakkhāṇāiṃ posahovavāsāiṃ na chaḍḍesi na bhaṃjesi, to taṃ ahaṃ ajja imeṇaṃ nīluppala-gavalaguliya-ayasikusumappagāseṇa khuradhāreṇa asiṇā khaṃḍākhaṃḍiṃ karemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se kāmadeve samaṇovāsae teṇaṃ divveṇaṃ pisāyarūveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se divve pisāyarūve kāmadevaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe tivaliyaṃ bhiuḍiṃ niḍāle sāhaṭṭu kāmadevaṃ samaṇovāsayaṃ nīluppala-gavalaguliya-ayasikusumappagāseṇa khuradhāreṇa asiṇā khaṃḍākhaṃḍiṃ karei|
tae ṇaṃ se kāmadeve samaṇovāsae taṃ ujjalaṃ viulaṃ kakkasaṃ pagāḍhaṃ caṃḍaṃ dukkha durahiyāsaṃ veyaṇaṃ sammaṃ sahai khamai titikkhai ahiyāsei|