Uvasagadasao 2.27

2.27

kāmadevāi! samaṇe bhagavaṃ mahāvīre kāmadevaṃ samaṇovāsayaṃ evaṃ vayāsī–se nūnaṃ kāmadevā! tubbhaṃ puvvarattāvarattakālasamayaṃsi ege deve aṃtiyaṃ pāubbhūe| tae ṇaṃ se deve egaṃ mahaṃ divvaṃ pisāyarūvaṃ viuvvai, viuvvittā āsuratte ruṭṭhe kuvie caṃḍikkie misimisīyamāṇe egaṃ mahaṃ nīluppala-gavala-guliya-ayasi-kusumappagāsaṃ khuradhāraṃ, asiṃ gahāya tumaṃ evaṃ vayāsī–haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to taṃ ajja ahaṃ imeṇaṃ nīluppala-gavalaguliya-ayasikusumappagāseṇa khuradhāreṇa asiṇā khaṃḍākhaṃḍiṃ karemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tumaṃ teṇaṃ divveṇaṃ pisāyarūveṇaṃ evaṃ vutte samāṇe abhīe jāva viharasi|
tae ṇaṃ se divve pisāyarūve tumaṃ abhīyaṃ jāva pāsai, pāsittā doccaṃ pi taccaṃ pi tumaṃ evaṃ vayāsī–haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to taṃ ahaṃ ajja imeṇaṃ nīluppala-gavalaguliya-ayasikusumappagāseṇa khuradhāreṇa asiṇā khaṃḍākhaṃḍiṃ karemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tume teṇaṃ divveṇaṃ pisāyarūveṇaṃ doccaṃ pi taccaṃ pi evaṃ vutte samāṇe abhīe jāva viharasi|
tae ṇa se divve pisāyarūve tumaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe tivaliyaṃ bhiuḍi niḍāle sāhaṭṭu tumaṃ nīluppala-gavalaguliya-ayasikusuma-ppagāseṇa khuradhāreṇa asiṇā khaṃḍākhaṃḍiṃ karei|
tae ṇaṃ tume taṃ ujjalaṃ jāva veyaṇaṃ sammaṃ sahasi khamasi titikkhasi ahiyāsesi| tae ṇaṃ se divve pisāyarūve tumaṃ abhīyaṃ jāva pāsai, pāsittā jāhe no saṃcāei, tumaṃ niggaṃthāo pāvayaṇāo cālittae vā khobhittae vā vipariṇāmittae vā, tāhe saṃte taṃte paritaṃte saṇiyaṃ-saṇiyaṃ paccosakkai, paccosakkittā posahasālāo paḍinikkhamai, paḍinikkhamittā divvaṃ pisāyarūvaṃ vippajahai, vippajahittā egaṃ mahaṃ divvaṃ hatthirūvaṃ viuvvai, viuvvittā jeṇeva posahasālā, jeṇeva tume, teṇeva uvāgacchai, uvāgacchittā tumaṃ evaṃ vayāsī–haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to taṃ ahaṃ ajja soṃḍāe geṇhāmi, geṇhittā posahasālāo nīṇemi, nīṇettā uḍḍhaṃ vehāsaṃ uvvihāmi, uvvihittā tikkhehiṃ daṃtamusalehiṃ paḍicchāmi, paḍicchittā ahe dharaṇitalaṃsi tikkhutto pāesu lolemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tume teṇaṃ divveṇaṃ hatthirūveṇaṃ evaṃ vutte samāṇe abhīe jāva viharasi|
tae ṇaṃ se divve hatthirūve tumaṃ abhīyaṃ jāva pāsai, pāsittā doccaṃ pi taccaṃ pi tumaṃ evaṃ vayāsī– haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to taṃ ajja ahaṃ soṃḍāe geṇhāmi, geṇhittā posahasālāo nīṇemi, niṇittā uḍḍhaṃ vehāsaṃ uvvihāmi, uvvihittā tikkhehiṃ daṃtamusalehiṃ paḍicchāmi, paḍicchittā ahe dharaṇitalaṃsi tikkhutto pāesu lolemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tume teṇaṃ divveṇaṃ hatthirūveṇaṃ doccaṃ pi taccaṃ pi evaṃ vutte samāṇe abhīe jāva viharasi|
tae ṇaṃ se divve hatthirūve tumaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe tumaṃ soṃḍāe geṇhatti, geṇhittā uḍḍhaṃ vehāsaṃ uvvihai, uvvihittā tikkhehiṃ daṃtamusalehiṃ paḍicchai, paḍicchittā ahe dharaṇitalaṃsi tikkhutto pāesu lolei|
tae ṇaṃ tume taṃ ujjalaṃ jāva veyaṇaṃ sammaṃ sahasi khamasi titikkhasi ahiyāsesi|
tae ṇaṃ se divve hatthirūve tumaṃ abhīyaṃ jāva pāsai, pāsittā jāhe no saṃcāeti niggaṃthāo pāvayaṇāo cālittae vā khobhittae vā vipariṇāmittae vā, tāhe saṃte taṃte paritaṃte saṇiyaṃ-saṇiyaṃ paccosakkai, paccosakkittā posahasālāo paḍinikkhamai, paḍinikkhamittā divvaṃ hatthirūvaṃ vippajahai, vippajahittā egaṃ mahaṃ divvaṃ sapparūvaṃ viuvvai, viuvvittā jeṇeva posahasālā, jeṇeva tumaṃ, teṇeva uvāgacchai, uvāgacchittā tumaṃ evaṃ vayāsī– haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ verama-ṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ajjeva ahaṃ sarasarassa kāyaṃ duruhāmi, duruhittā pacchimeṇaṃ bhāeṇaṃ tikkhutto gīvaṃ veḍhemi, veḍhittā tikkhāhiṃ visaparigatāhiṃ dāḍhāhiṃ uraṃsi ceva nikuṭṭemi, jahā ṇaṃ tumaṃ devānuppiyā! aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tume teṇaṃ divveṇaṃ sapparūveṇaṃ evaṃ vutte samāṇe abhīe jāva viharasi|
tae ṇaṃ se divve sapparūve tumaṃ abhīyaṃ jāva pāsai, pāsittā doccaṃ pi taccaṃ pi tumaṃ evaṃ vayāsī–haṃbho! kāmadevā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ajjeva ahaṃ sarasarassa kāyaṃ duruhāmi, duruhittā pacchimeṇaṃ bhāeṇaṃ tikkhutto gīvaṃ veḍhemi, veḍhittā tikkhāhiṃ visaparigatāhiṃ dāḍhāhiṃ uraṃsi ceva nikuṭṭemi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tumaṃ teṇaṃ divveṇaṃ sapparūveṇaṃ doccaṃ pi taccaṃ pi evaṃ vutte samāṇe abhīe jāva viharasi|
tae ṇaṃ se divve sapparūve tumaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe tubbhaṃ sarasarassa kāyaṃ duruhai, duruhittā pacchimeṇaṃ bhāeṇaṃ tikkhutto gīvaṃ veḍhei, veḍhettā tikkhāhiṃ visaparigatāhiṃ dāḍhāhiṃ uraṃsi ceva nikuṭṭei|
tae ṇaṃ tume taṃ ujjalaṃ jāva veyaṇaṃ sammaṃ sahasi khamasi titikkhasi ahiyāsesi|
tae ṇaṃ se divve sapparūve tumaṃ abhīyaṃ jāva pāsai, pāsittā jāhe no saṃcāei tumaṃ niggaṃthāo pāvayaṇāo cālittae vā kho-bhittae vā vipariṇāmettae vā, tāhe saṃte taṃte paritaṃte saṇiyaṃ-saṇiyaṃ paccosakkai, paccosakkittā posahasālāo paḍinikkhamai, paḍinikkhamittā divvaṃ sapparūvaṃ vippajahai, vippajahittā egaṃ mahaṃ divvaṃ devarūvaṃ viuvvai, viuvvittā posahasālaṃ anuppavisai, anuppavisittā aṃtalikkhapaḍivaṇṇe sakhiṃkhiṇiyāiṃ paṃcavaṇṇāiṃ vatthāiṃ pavara parihie tumaṃ evaṃ vayāsī–
haṃbho! kāmadevā! samaṇovāsayā! dhaṇṇesi ṇaṃ tumaṃ devānuppiyā! puṇṇesi ṇaṃ tumaṃ devānuppiyā! kayatthesi ṇaṃ tumaṃ devānuppiyā! kayalakkhaṇesi ṇaṃ tumaṃ devānuppiyā! suladdhe ṇaṃ tava devānuppiyā! mānussae jammajīviyaphale, jassa ṇaṃ tava niggaṃthe pāvayaṇe imeyārūvā paḍivattī laddhā pattā abhisamaṇṇāgayā|
evaṃ khalu devānuppiyā! sakke deviṃde devarāyā jāva evamāikkhai, evaṃ bhāsai, evaṃ pannavei, evaṃ parūvei evaṃ khalu devā! jaṃbuddīve dīve bhārahe vāse caṃpāe nayarīe kāmadeve samaṇovāsae posahasālāe posahie baṃbhacārī ummukkamaṇisuvaṇṇe vavagayamālāvaṇṇagavilevaṇe nikkhittasatthamusale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai| no khalu se sakke keṇai deveṇa vā dāṇaveṇa vā jakkheṇa vā rakkhaseṇa vā kinnareṇa vā kiṃpuriseṇa vā mahorageṇa vā gaṃdhavveṇa vā niggaṃthāo pāvayaṇāo cālittae vā khobhittae vā vipariṇāmettae vā|
tae ṇaṃ ahaṃ sakkassa deviṃdassa devaraṇṇo eyamaṭṭhaṃ asaddahamāṇe apattiyamāṇe aroemāṇe ihaṃ havvamāgae| taṃ aho ṇaṃ devānuppiyāṇaṃ iḍḍhī juī jaso balaṃ vīriyaṃ purisakkāra-parakkame laddhe patte abhisamaṇṇāgae| taṃ diṭṭhā ṇaṃ devānuppiyāṇaṃ iḍḍhī juī jaso balaṃ vīriyaṃ purisakkāra-parakkame laddhe patte abhisamannāgae| taṃ khāmemi ṇaṃ devānuppiyā! khamaṃtu ṇaṃ devānuppiyā! khaṃtumarihaṃti ṇaṃ devā-ṇuppiyā! nāiṃ bhujjo karaṇayāe tti kaṭṭu pāyavaḍie paṃjaliuḍe eyamaṭṭhaṃ bhujjo-bhujjo khāmei, khāmettā jāmeva disaṃ pāubbhūe, tāmeva disaṃ paḍigae| se nūnaṃ kāmadevā! aṭṭhe samaṭṭhe?
haṃtā atthi|
ajjoti! samaṇe bhagavaṃ mahāvīre bahave samaṇe niggaṃthe ya niggaṃthīo ya āmaṃtettā evaṃ vayāsī–jai tāva ajjo! samaṇovāsagā gihiṇo gihamajjhāvasaṃtā divva-mānusa-tirikkhajoṇie uvasagge sammaṃ sahaṃti khamaṃti titikkhaṃti ahiyāseṃti, sakkā puṇāiṃ ajjo! samaṇehiṃ niggaṃthehiṃ duvālasaṃgaṃ gaṇipiḍagaṃ ahijjamāṇehiṃ divva-māṇusa-tirikkhajoṇie uvasagge sammaṃ sahittae khamittae titi-kkhittae ahiyāsittae|
tato te bahave samaṇā niggaṃthā ya niggaṃthīo ya samaṇassa bhagavao mahāvīrassa taha tti eyamaṭṭhaṃ vinaeṇaṃ paḍisuṇeṃti|
tae ṇaṃ se kāmadeve samaṇovāsae haṭṭhatuṭṭhacittamāṇaṃdie pīimaṇe paramasomaṇassie harisavasa-visappamāṇahiyae samaṇaṃ bhagavaṃ mahāvīraṃ pasiṇāiṃ pucchai, aṭṭhamādiyai, samaṇaṃ bhagavaṃ mahāvīraṃ tikkhutto āyāhiṇa-payāhiṇa karei, karettā vaṃdai namaṃsai, vaṃdittā namaṃsittā jāmeva disaṃ pāubbhūe, tāmeva disaṃ paḍigae|
tae ṇaṃ samaṇe bhagavaṃ mahāvīre annadā kadāi caṃpāo nayarīo paḍinikkhamai, paḍinikkhamittā bahiyā janavayavihāraṃ viharai|