Uvasagadasao 2.26

2.26

tae ṇaṃ se kāmadeve samaṇovāsae imīse kahāe laddhaṭṭhe samāṇe–evaṃ khalu samaṇe bhagavaṃ mahāvīre puvvāṇupuvviṃ caramāṇe gāmāṇugāmaṃ dūijjamāṇe ihamāgae iha saṃpatte iha samosaḍhe iheva caṃpāe nayarīe bahiyā puṇṇabhadde ceie ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai| taṃ seyaṃ khalu mama samaṇaṃ bhagavaṃ mahāvīraṃ vaṃdittā namaṃsittā tato paḍiṇiyattassa posahaṃ pārettae tti kaṭṭu evaṃ saṃpehei, saṃpehettā posahasālāo paḍinikkhamai paḍinikkhamittā suddhappāvesāiṃ maṃgallāiṃ vatthāiṃ pavara parihie manussavaggurāparikkhitte sayāo gihāo paḍinikkhamittā caṃpaṃ nayariṃ majjhaṃmajjheṇaṃ niggacchai, niggacchittā jeṇeva puṇṇabhadde ceie, jeṇeva samaṇe bhagavaṃ mahāvīre, teṇeva uvāgacchai, uvāgacchittā tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā tivihāe pajjuvāsaṇāe pajjuvāsai|
tae ṇaṃ samaṇe bhagavaṃ mahāvīre kāmadevassa samaṇovāsayassa tīse ya mahaimahāliyāe parisāe jāva dhammaṃ parikahei dhammakahā samattā|