Uvasagadasao 3.30

3.30

tae ṇaṃ tassa culaṇīpiyassa samaṇovāsayassa puvvarattāvarattakālasamayaṃsi ege deve aṃtiyaṃ pāubbhūe|
tae ṇaṃ se deve egaṃ mahaṃ nīluppala-gavalaguliya-ayasikusumappagāsaṃ khuradhāraṃ asiṃ gahāya culaṇīpiyaṃ samaṇovāsayaṃ evaṃ vayāsī– haṃbho! culanīpitā! samaṇovāsayā! appatthiyapatthiyā! duraṃta-paṃta-lakkhaṇā! hīnapuṇṇacāuddasiyā! siri-hiri-dhii-kitti-parivajjiyā! dhammakāmayā! puṇṇakāmayā! saggakāmayā! mokkhakāmayā! dhammakaṃkhiyā! puṇṇakaṃkhiyā! saggakakhiyā! mokkhakakhiyā! dhammapivāsiyā! puṇṇapivāsiyā! saggapivāsiyā! mokkhapivāsiyā! no khalu kappai tava devāṇu-ppiyā! sīlāiṃ vayāiṃ veramaṇāiṃ paccakkhāṇāiṃ posahovavāsāiṃ cālittae vā khobhittae vā khaṃḍittae vā bhaṃjittae vā ujjhittae vā pariccaittae vā, taṃ jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se culanīpitā samaṇovāsae teṇaṃ deveṇaṃ evaṃ vutte samāṇe abhīe atatthe aṇuvvigge akhubhie acalie asaṃbhaṃte tusiṇīe dhammajjhāṇovagae viharai|
tae ṇaṃ se deve culaṇīpiyaṃ samaṇovāsayaṃ abhīyaṃ atatthaṃ aṇuvviggaṃ akhubhiyaṃ acaliyaṃ asaṃbhaṃtaṃ tusiṇīyaṃ dhammajjhāṇovagayaṃ viharamāṇaṃ pāsai, pāsittā doccaṃ pi taccaṃ pi culaṇīpiyaṃ samaṇovāsayaṃ evaṃ vayāsī–haṃbho! culanīpiyā! samaṇovāsayā! jāva jai ṇaṃ tumaṃ ajjaṃ sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jeṭṭha putta sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi
tae ṇaṃ se culanīpitā samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe culaṇīpiyassa samaṇovāsayassa jeṭṭhaputtaṃ gihāno nīṇei, nīṇettā aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā culaṇīpiyassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se culanīpitā samaṇovāsae taṃ ujjalaṃ viulaṃ kakkasaṃ pagāḍhaṃ caṃḍaṃ dukkhaṃ durahiyāsaṃ veyaṇaṃ sammaṃ sahai khamai titikkhai ahiyāsei|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā culaṇīpiyaṃ samaṇovāsayaṃ evaṃ vayāsī– haṃbho culanīpitā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādāna-bhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se culanīpitā samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi culaṇīpiyaṃ samaṇovāsayaṃ evaṃ vayāsī– haṃbho! culanīpiyā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja majjhimaṃ puttaṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se culanīpiyā samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe culaṇīpiyassa samaṇovāsayassa majjhimaṃ puttaṃ gihāo nīṇei, nīṇettā aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā culaṇīpiyassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se culanīpitā samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā culaṇīpiyaṃ samaṇo-vāsayaṃ evaṃ vayāsī–haṃbho culanīpitā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjasi, to te ahaṃ ajja kanīyasaṃ puttaṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādāna-bhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se culanīpitā samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi culaṇīpiyaṃ samaṇovāsayaṃ evaṃ vayāsī– haṃbho! culanīpitā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja kanīyasaṃ puttaṃ sāo gihāo noṇemi, noṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tuma aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se culanīpitā samaṇovāsae teṇaṃ deveṇaṃ doccaṃ pi taccaṃ pi evaṃ vutte samāṇe abhīe jāva viharai|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe culaṇīpiyassa samaṇovāsayassa kanīyasaṃ puttaṃ gihāo nīṇei, nīṇettā aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā culaṇīpiyassa samaṇovāsayassa gāyaṃ maṃseṇa ya soṇieṇa ya āiṃcai|
tae ṇaṃ se culanīpitā samaṇovāsae taṃ ujjalaṃ jāva veyaṇaṃ sammaṃ sahai khamai titikkhai ahiyāsei|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā cautthaṃ pi culaṇīpiyaṃ samaṇovāsayaṃ evaṃ vayāsī–haṃbho! culanīpiyā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jā imā māyā bhaddā satthavāhī devataṃ guru-jaṇaṇī dukkara-dukkarakāriyā taṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ se culanīpitā samaṇovāsae teṇaṃ deveṇaṃ evaṃ vutte samāṇe abhīe jāva viharai|
tae ṇaṃ se deve culaṇīpiyaṃ samaṇovāsayaṃ abhīyaṃ jāva pāsai, pāsittā doccaṃ pi taccaṃ pi culaṇīpiyaṃ samaṇovāsayaṃ evaṃ vayāsī–haṃbho! culanīpitā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to te ahaṃ ajja jā imā māyā bhaddā satthavāhī devataṃ guru-jaṇaṇī dukkara-dukkarakāriyā, taṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ tassa culaṇīpiyassa samaṇovāsayassa teṇaṃ deveṇaṃ doccaṃ pi taccaṃ pi evaṃ vuttassa samāṇassa imeyārūve ajjhatthie ciṃtie patthie manogae saṃkappe samuppajjitthā–aho ṇaṃ ime purise anārie anāriyabuddhī anāriyāiṃ pāvāiṃ kammāiṃ samācarati, je ṇaṃ mamaṃ jeṭṭhaṃ puttaṃ sāo gihāo nīṇei, nīṇettā mama aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mama majjhimaṃ puttaṃ sāo gihāo nīṇei nīṇettā mama aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mama kanīyasaṃ puttaṃ sāo gihāo nīṇei, nīṇettā mama aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, jā vi ya ṇaṃ imā mamaṃ māyā bhaddā satthavāhī devataṃ guru-jaṇaṇī dukkara-dukkarakāriyā, taṃ pi ya ṇaṃ icchai sāo gihāo nīṇettā mama aggao ghāettae– taṃ seyaṃ khalu mamaṃ eyaṃ purisaṃ giṇhittae ti kaṭṭu uddhāvie, se vi ya āgāse uppaie, teṇa ca khaṃbhe āsāie, mahayāmahayā saddeṇaṃ kolāhale kae|
tae ṇaṃ sā bhaddā satthavāhī taṃ kolāhalasaddaṃ soccā nisamma jeṇeva culanīpiyā samaṇovāsae, teṇeva uvāgacchai, uvāgacchittā culanīpiyaṃ samaṇovāsayaṃ evaṃ vayāsī– kiṇṇaṃ puttā! tumaṃ mahayā-mahayā saddeṇaṃ kolāhale kae?
tae ṇaṃ se culanīpiyā samaṇovāsae ammayaṃ bhaddaṃ satthavāhiṃ evaṃ vayāsī– evaṃ khalu ammo! na yāṇāmi ke vi purise āsuratte ruṭṭhe kuvie caṃḍikkie misimisīyamāṇe egaṃ mahaṃ nīluppala-gavalaguliya-ayasikusumappagāsaṃ khuradhāraṃ asiṃ gahāya mamaṃ evaṃ vayāsī–haṃbho! culanīpiyā! samaṇo-vāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavā-sāiṃ na chaḍḍesi na bhaṃjesi, to te ahaṃ ajja jeṭṭhaputtaṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi| tae ṇaṃ ahaṃ teṇaṃ puriseṇaṃ evaṃ vutte samāṇe abhīe jāva viharāmi|
tae ṇaṃ se purise mamaṃ amīyaṃ jāva pāsai, pāsittā mamaṃ doccaṃ pi taccaṃ pi evaṃ vayāsī– haṃbho! culanīpiyā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to jāva tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ ahaṃ teṇaṃ puriseṇaṃ doccaṃ pi taccaṃ pi evaṃ vutte samāṇe abhīe jāva viharāmi|
tae ṇaṃ se purise mamaṃ abhīyaṃ jāva pāsai, pāsittā āsuratte ruṭṭhe kuvie caṃḍikkie misimisīyamāṇe mamaṃ jeṭṭhaputtaṃ nīṇei, nīṇettā mama aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai|
tae ṇaṃ ahaṃ taṃ ujjalaṃ jāva veyaṇaṃ sammaṃ sahāmi khamāmi titikkhāmi ahiyāsemi|
evaṃ majjhimaṃ puttaṃ jāva veyaṇaṃ sammaṃ sahāmi khamāmi titikkhāmi ahiyāsemi|
evaṃ kanīyasaṃ puttaṃ jāva veyaṇaṃ sammaṃ sahāmi khamāmi titikkhāmi ahiyāsemi|
tae ṇaṃ se purise mamaṃ abhīyaṃ jāva pāsai, pāsittā mamaṃ cautthaṃ pi evaṃ vayāsī–haṃbho! culanīpiyā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, te ahaṃ ajja jā imā māyā devattaṃ guru-jananī dukkara-dukkarakāriyā, taṃ sāo gihāo nīṇemi, nīṇettā tava aggao ghāemi, ghāettā tao maṃsasolle karemi, karettā ādānabhariyaṃsi kaḍāhayaṃsi addahemi, addahettā tava gāyaṃ maṃseṇa ya soṇieṇa ya āiṃcāmi, jahā ṇaṃ tuma aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ ahaṃ teṇaṃ puriseṇaṃ evaṃ vutte samāṇe abhīe jāva viharāmi|
tae ṇaṃ se purise mamaṃ abhīyaṃ jāva pāsai, pāsittā doccaṃ pi taccaṃ pi mamaṃ evaṃ vayāsī–haṃbho! culanīpiyā! samaṇovāsayā! jāva jai ṇaṃ tumaṃ ajja sīlāiṃ vayāiṃ veramaṇāiṃ paccakkhāṇāiṃ posahovavāsāiṃ na chaḍḍesi na bhaṃjesi, to jāva tumaṃ aṭṭa-duhaṭṭa-vasaṭṭe akāle ceva jīviyāo vavarovijjasi|
tae ṇaṃ teṇaṃ puriseṇaṃ doccaṃ pi taccaṃ pi mamaṃ evaṃ vuttassa samāṇassa imeyārūve ajjhatthie ciṃtie patthie manogae saṃkappe samuppajjitthā–aho ṇaṃ ime purise anārie anāriyabuddhī anāriyāiṃ pāvāiṃ kammāiṃ samācarati, je ṇaṃ mamaṃ jeṭṭhaṃ puttaṃ sāo gihāo nīṇei, nīṇettā mama aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mamaṃ majjhimaṃ puttaṃ sāo gihāo nīṇei, nīṇettā mama aggao ghāei, ghāettā tao maṃsasolle karei, karettā ādānabhariyaṃsi, kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, je ṇaṃ mamaṃ kanīyasaṃ puttaṃ sāo gihāo nīṇei, nīṇettā mama aggao ghāei, ghāettā tao maṃsasolle karei, karettā ādānabhariyaṃsi kaḍāhayaṃsi addahei, addahettā mamaṃ gāyaṃ maṃseṇa ya soṇieṇa ya āiṃcai, tubbhe vi ya ṇaṃ icchai sāo gihāo nīṇettā mama aggao ghāettae, taṃ seyaṃ khalu mamaṃ eyaṃ purisaṃ giṇhittae tti kaṭṭu uddhāvie| se vi ya āgāse uppaie mae vi ya khaṃbhe āsāie, mahayā-mahayā saddeṇaṃ kolāhale kae|
tae ṇaṃ sā bhaddā satthavāhī culaṇīpiyaṃ samaṇovāsayaṃ evaṃ vayāsī–no khalu kei purise tava jeṭṭhaputtaṃ sāo gihāo nīṇei, nīṇettā tava aggao ghāei, no khalu kei purise tava majjhimaṃ puttaṃ sāo gihāo nīṇei, nīṇettā tava aggao ghāei, no khalu kei purise tava kanīyasaṃ puttaṃ sāo gihāo nīṇei, nīṇettā tava aggao ghāei, esa ṇaṃ kei purise tava uvasaggaṃ karei, esa ṇaṃ tume vidarisaṇe diṭṭhe| taṃ ṇaṃ tumaṃ iyāṇiṃ bhaggavae bhagganiyame bhaggaposahe viharasi|
taṃ ṇa tumaṃ puttā! eyassa ṭhāṇassa āloehi paḍikkamāhi niṃdāhi garihāhi viuṭṭāhi visohehi akaraṇayāe abbhuṭṭhāhi ahārihaṃ pāyacchittaṃ tavokammaṃ0 paḍivajjāhi|
tae ṇaṃ se culanīpitā samaṇovāsae ammāe bhaddāe satthavāhīe taha tti eyamaṭṭhaṃ vinaeṇaṃ paḍisuṇei, paḍisuṇettā tassa ṭhāṇassa āloei paḍikkamai niṃdai garihai viuṭṭai visohei akaraṇayāe abbhuṭṭhei ahārihaṃ pāyacchittaṃ tavokammaṃ paḍivajjai|