Uvasagadasao 3.31

3.31

tae ṇaṃ se culanīpitā samaṇovāsae paḍhamaṃ uvāsagapaḍimaṃ uvasaṃpajjittā ṇaṃ viharai|
tae ṇaṃ se culanīpitā samaṇovāsae paḍhamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se culanīpitā samaṇovāsae doccaṃ uvāsagapaḍimaṃ, evaṃ taccaṃ, cautthaṃ, paṃcamaṃ, chaṭṭhaṃ, sattamaṃ, aṭṭhamaṃ, navamaṃ, dasamaṃ, ekkārasamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei
tae ṇaṃ se culanīpitā samaṇovāsae teṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamanisaṃtae jāe|
tae ṇaṃ tassa culaṇīpiyassa samaṇovāsagassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa ayaṃ ajjhatthie ciṃtie patthie manogae saṃkappe samuppajjitthā–evaṃ khalu ahaṃ imeṇaṃ eyārūveṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamanisaṃtae jāe| taṃ atthi tā me uṭṭhāṇe kamme bale vīrie purisakkāra-parakkame saddhā-dhii-saṃvege, taṃ jāvatā me atthi uṭṭhāṇe kamme bale vīrie purisakkāra-parakkame saddhā-dhii-saṃvege, jāva ya me dhammāyarie dhammovaesae samaṇe bhagavaṃ mahāvīre jine suhatthī viharai, tāvatā me seyaṃ kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsiyassa bhattapāna-paḍiyā-ikkhiyassa, kālaṃ anavakaṃkhamāṇassa viharittae–evaṃ saṃpehei, saṃpehettā kallaṃ pāuppabhāyāe rayaṇīe jāva uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsie bhattapāna-paḍiyāikkhie kālaṃ aṇavakaṃkhamāṇe viharai|
tae ṇaṃ se culanīpitā samaṇovāsae, bahūhiṃ sola-vvaya-guṇa-veramaṇa-paccakkhāṇa-posaho-vavāsehiṃ appāṇaṃ bhāvettā, vīsaṃ vāsāiṃ samaṇovāsagapariyāgaṃ pāuṇittā, ekkārasa ya uvāsaga-paḍimāo sammaṃ kāeṇaṃ phāsittā, māsiyāe saṃlehaṇāe attāṇaṃ jjhūsittā, saṭṭhiṃ bhattāiṃ anasaṇāe chedettā, āloiya-paḍikkaṃte samāhipatte kālamāse kālaṃ kiccā sohamme kappe sohammavaḍiṃsagassa mahāvimānassa uttarapuratthime ṇaṃ aruṇappabhe vimāṇe devattāe uvavaṇṇe| cattāri paliovamāiṃ ṭhiī pannattā| mahāvidehe vāse sijjhi hii bujjhihii muccihii savvadukkhāṇamaṃtaṃ kāhii|
evaṃ khalu jaṃbū! samaṇeṇaṃ bhagavayā mahāvīreṇaṃ uvāsagadasāṇaṃ taccassa ajjhayaṇassa ayamaṭṭhe pannatte|