Uvasagadasao 6.38

6.38

tae ṇaṃ se kuṃḍakolie samaṇovāsae annadā kadāi paccāvaraṇhakālasamayaṃsi jeṇeva asogavaṇiyā, jeṇeva puḍhavisilāpaṭṭae, teṇeva uvāgacchai, uvāgacchittā nāmamuddagaṃ ca uttarijjagaṃ ca puḍhavisilāpaṭṭae ṭhavei, ṭhavettā samaṇassa bhagavao mahāvīrassa aṃtiyaṃ dhammapannatti uvasaṃpajjittā ṇaṃ viharai|
tae ṇaṃ tassa kuṃḍakoliyassa samaṇovāsayassa ege deve aṃtiyaṃ pāubbhavitthā|
tae ṇaṃ se deve nāmamuddagaṃ ca uttarijjagaṃ ca puḍhavisilāpaṭṭayāo geṇhai, geṇhittā aṃtalikkhapaḍivaṇṇe sakhiṃkhiṇiyāiṃ paṃcavaṇṇāiṃ vatthāiṃ pavara parihie kuṃḍakoliyaṃ samaṇovāsayaṃ evaṃ vayāsī–haṃbho! kuṃḍakoliyā! samaṇovāsayā! suṃdarī ṇaṃ devānuppiyā! gosālassa maṃkhaliputtassa dhammapannattī–natthi uṭṭhāṇe i vā kamme i vā bale i vā vīrie i vā purisakkāra-parakkame i vā niyatā savvabhāvā, maṃgulī ṇaṃ samaṇassa bhagavao mahāvīrassa dhammapannattī–atthi uṭṭhāṇe i vā, kamme i vā bale i vā vīrie i vā purisakkāra-parakkame i vā aṇiyatā savvabhāvā|
tae ṇaṃ se kuṃḍakolie samaṇovāsae taṃ devaṃ evaṃ vayāsī–jai ṇaṃ devānuppiyā! suṃdarī ṇaṃ gosālassa maṃkhaliputtassa dhammapannattī–natthi uṭṭhāṇe i vā kamme i vā bale i vā vīrie i vā purisakkāra-parakkame i vā niyatā savvabhāvā, maṃgulī ṇaṃ sama-ṇassa bhagavao mahāvīrassa dhamma-pannattī–atthi uṭṭhāṇe i vā kamme i vā bale i vā vīrie i vā purisakkāra-parakkame i vā aniyatā savvabhāvā, tume ṇaṃ devānuppiyā! imā eyārūvā divvā deviḍḍhī divvā devajjuī divve devāṇubhāve kiṇṇā laddhe? kiṇṇā patte? kiṇṇā abhisamaṇṇāgae? kiṃ uṭṭhāṇeṇaṃ kammeṇaṃ baleṇaṃ vīrieṇaṃ purisakkāra-parakkameṇaṃ? udāhu aṇuṭṭhāṇeṇaṃ akammeṇaṃ abaleṇaṃ avīrieṇaṃ apurisakkāra-parakkameṇaṃ?
tae ṇaṃ se deve kuṃḍakoliyaṃ samaṇovāsayaṃ evaṃ vayāsī–evaṃ khalu devānuppiyā! mae imā eyārūvā divvā deviḍḍhī divvā devajjuī divve devāṇubhāve aṇuṭṭhāṇeṇaṃ akammeṇaṃ abaleṇaṃ avīrieṇaṃ apurisakkāraparakkameṇaṃ laddhe patte abhisamaṇṇāgae|
tae ṇaṃ se kuṃḍakolie samaṇovāsae taṃ devaṃ evaṃ vayāsī–jai ṇaṃ devānuppiyā! tume imā eyārūvā divvā deviḍḍhī divvā devajjuī divve devāṇubhāve aṇuṭṭhāṇeṇaṃ akammeṇaṃ abaleṇaṃ avīrieṇaṃ0 apurisakkāraparakkameṇaṃ laddhe patte abhisamaṇṇāgae, jesi ṇaṃ jīvāṇaṃ natthi uṭṭhāṇe i vā kamme i vā bale i vā vīrie i vā purisakkāra0-parakkame i vā, te kiṃ na devā?
aha tubbhe imā eyārūvā divvā deviḍḍhī divvā devajjuī divve devāṇubhāve uṭṭhāṇeṇaṃ kammeṇaṃ baleṇaṃ vīrieṇaṃ purisakkāra-parakkameṇaṃ laddhe patte abhisamaṇṇāgae, to jaṃ vadasi suṃdarī ṇaṃ gosālassa maṃkhaliputtassa dhammapannattī–natthi uṭṭhāṇe i vā kamme i vā bale i vā vīrie i vā purisakkāra-parakkame i vā niyatā savvabhāvā, maṃgulī ṇaṃ samaṇassa bhagavao mahāvīrassa dhammapannattī–atthi uṭṭhāṇe i vā kamme i vā bale i vā vīrie i vā purisakkāra-parakkame i vā aniyattā savvabhāvā, taṃ te micchā|
tae ṇaṃ se deve kuṃḍakolieṇaṃ samaṇovāsaeṇaṃ evaṃ vutte samāṇe saṃkie kaṃkhie vitigicchā-samāvaṇṇe kalusasamāvaṇṇe no saṃcāei kuṃḍakoliyassa samaṇovāsayassa kiṃci pamokkhamā-ikkhittae, nāmamuddagaṃ ca uttarijjayaṃ ca puḍhavisilāpaṭṭae ṭhavei, ṭhavettā jāmeva disaṃ pāubbhūe, tāmeva disaṃ paḍigae|
teṇaṃ kāleṇaṃ teṇaṃ samaeṇaṃ sāmī samosaḍhe|
tae ṇaṃ se kuṃḍakolie samaṇovāsae imīse kahāe laddhaṭṭhe samāṇe–evaṃ khalu samaṇe bhagavaṃ mahāvīre puvvāṇupuvviṃ caramāṇe gāmāṇugāmaṃ dūijjamāṇe ihamāgae iha saṃpatte iha samosaḍhe iheva kaṃpillapurassa nayarassa bahiyā sahassaṃbavaṇe ujjāṇe ahā-paḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
taṃ seyaṃ khalu mama samaṇaṃ bhagavaṃ mahāvīraṃ vaṃdittā namaṃsittā tato paḍiṇiyattassa posahaṃ pārettae tti kaṭṭu evaṃ saṃpehei, saṃpehettā posahasālāo paḍinikkhamai, paḍinikkhamittā suddhappāvesāiṃ maṃgallāiṃ vatthāiṃ pavara parihie manussavaggurāparikkhitte sayāo gihāo paḍinikkhamai, paḍinikkhamittā kaṃpillapuraṃ nayaraṃ majjhaṃmajjheṇaṃ niggacchai, niggacchittā jeṇeva sahassaṃbavaṇaṃ ujjāṇe, jeṇeva samaṇe bhagavaṃ mahāvīre, teṇeva uvāgacchai, uvāgacchittā tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā tivihāe pajjuvāsaṇāe pajjuvāsai|
tae ṇaṃ samaṇe bhagavaṃ mahāvīre kuṃḍakoliyassa samaṇovāsayassa tīse ya mahaimahāliyāe parisāe jāva dhammaṃ parikahei|