Uvasagadasao 6.39

6.39

kuṃḍakoliyāi! samaṇe bhagavaṃ mahāvīre kuṃḍakoliyaṃ samaṇovāsayaṃ evaṃ vayāsī–se nūṇaṃ kuṃḍakoliyā! kallaṃ tubbhaṃ paccāvaraṇhakālasamayaṃsi asogavaṇiyāe ege deve aṃtiyaṃ pāubbhavitthā|
tae ṇaṃ se deve nāmamuddagaṃ ca uttarijjagaṃ ca puḍhavisilāpaṭṭayāo geṇhai, geṇhittā aṃtalikkha-paḍivaṇṇe sakhiṃkhiṇiyāiṃ paṃcavaṇṇāiṃ vatthāiṃ pavara parihie tumaṃ evaṃ vayāsī–haṃbho! kuṃḍakoliyā! samaṇovāsayā! suṃdarī ṇaṃ devānuppiyā! gosālassa maṃkhalipu-ttassa dhammapannattī–natthi uṭṭhāṇe i vā kamme i vā bale i vā vīrie i vā purisakkāra-parakkame i vā niyatā savvabhāvā, maṃgulī ṇaṃ samaṇassa bhagavao mahāvīrassa dhammapannattī–atthi uṭṭhāṇe i vā kamme i vā bale i vā vīrie i vā purisakkāra-parakkame i vā aniyatā savvabhāvā!
tae ṇaṃ tumaṃ taṃ devaṃ evaṃ vayāsī–jai ṇaṃ devānuppiyā! suṃdarī ṇaṃ gosālassa maṃkhaliputtassa dhammapannattī–natthi uṭṭhāṇe i vā jāva purisakkāra-parakamme i vā niyatā savvabhāvā, maṃgulī ṇaṃ samaṇassa bhagavao mahāvīrassa dhammapannattī–atthi uṭṭhāṇe i vā jāva purisakkāra-parakkame i vā aṇiyatā savvabhāvā, tume ṇaṃ devānuppiyā! imā eyārūvā divvā deviḍḍhī divvā devajjuī divve devāṇubhāve kiṇṇā laddhe? kiṇṇā patte? kiṇṇā abhisamannāgae? kiṃ uṭṭhāṇeṇaṃ jāva purisakkāra-parakkameṇaṃ? udāhu anuṭṭhāṇeṇaṃ jāva apurisakkāraparakammeṇaṃ?
tae ṇaṃ se deve tumaṃ evaṃ vayāsī–evaṃ khalu devānuppiyā! mae imā eyārūvā divvā deviḍḍhī divvā devajjuī divve devāṇubhāve aṇuṭṭhāṇeṇaṃ jāva apurisakkāraparakkameṇaṃ laddhe patte abhisamaṇṇāgae|
tae ṇaṃ tumaṃ taṃ devaṃ evaṃ vayāsī–jai ṇaṃ devānuppiyā! tume imā eyārūvā divvā deviḍḍhī divvā devajjuī divve devāṇubhāve aṇuṭṭhāṇeṇaṃ jāva apurisakkāraparakkameṇaṃ laddhe patte abhisamaṇṇāgae, jesi ṇaṃ jīvāṇaṃ natthi uṭṭhāṇe i vā jāva parakkame i vā, te kiṃ na devā?
aha tubbhe imā eyārūvā divvā deviḍḍhī divvā devajjuī divve devāṇubhāve uṭṭhāṇeṇaṃ jāva parakkameṇaṃ laddhe patte abhisamaṇṇāgae, to jaṃ vadasi suṃdarī ṇaṃ gosālassa maṃkhaliputtassa dhammapannattī–natthi uṭṭhāṇe i vā jāva niyatā savvabhāvā, maṃgulī ṇaṃ samaṇassa bhagavao mahāvīrassa dhammapannattī–atthi uṭṭhāṇe i vā jāva aṇiyatā savvabhāvā, taṃ te micchā| tae ṇaṃ se deve tumaṃ evaṃ vutte samāṇe saṃkie kaṃkhie vitigicchāsamāvaṇṇe kalusasamāvaṇṇe no saṃcāei tubbhe kiṃci pamokkhamāikkhittae, nāmamuddagaṃ ca uttari-jjayaṃ ca puḍhavisilāpaṭṭae ṭhavei, ṭhavettā jāmeva disaṃ pāubbhūe, tāmeva disaṃ paḍigae| se nūṇaṃ kuṃḍakoliyā! aṭṭhe samaṭṭhe?
haṃtā atthi|
ajjoti! samaṇe bhagavaṃ mahāvīre bahave samaṇā niggaṃthā ya niggaṃthīo ya āmaṃtettā evaṃ vayāsī–jai tāva ajjo! gihiṇo gihimajjhāvasaṃtā annautthie aṭṭhehi ya heūhi ya pasiṇehi ya kāraṇehi ya vāgaraṇehi ya nippaṭṭha-pasiṇavāgaraṇe kareṃti, sakkā puṇāiṃ ajjo! samaṇehiṃ niggaṃthehiṃ duvālasaṃgaṃ gaṇipiḍagaṃ ahijjamāṇehiṃ annautthiyā aṭṭhehi ya heūhi ya pasiṇehi ya kāraṇehi ya vāgaraṇehi ya nippaṭṭhapasiṇavāgaraṇā karettae|
tae ṇaṃ te bahave samaṇā niggaṃthā ya niggaṃthīo ya samaṇassa bhagavao mahāvīrassa taha tti eyamaṭṭhaṃ vinaeṇaṃ paḍisuṇeṃti|
tae ṇaṃ se kuṃḍakolie samaṇovāsae samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā pasiṇāiṃ pucchai, pucchittā aṭṭhamādiyai, aṭṭhamādittā jāmeva disaṃ pāubbhūe tāmeva disaṃ paḍigae|
sāmī bahiyā janavayavihāraṃ viharai|