Uvasagadasao 8.55

8.55

teṇaṃ kāleṇaṃ teṇaṃ samaeṇaṃ samaṇe bhagavaṃ mahāvīre samosarie| parisā paḍigayā|
goyamāi! samaṇe bhagavaṃ mahāvīre bhagavaṃ goyamaṃ evaṃ vayāsī–evaṃ khalu goyamā! iheva rāyagihe nayare mamaṃ aṃtevāsī mahāsatae nāmaṃ samaṇovāsae posahasālāe apacchimamāraṇaṃtiyasaṃlehaṇāe jjhūsiyasarīre bhattapāna-paḍiyāikkhie, kālaṃ aṇavakaṃkhamāṇe viharai|
tae ṇaṃ tassa mahāsatagassa samaṇovāsagassa revatī gāhāvaiṇī mattā luliyā viiṇṇakesī uttarijjayaṃ vikaḍḍhamāṇī-vikaḍḍhamāṇī jeṇeva posahasālā, jeṇeva mahāsatae samaṇovāsae, teṇeva uvāgacchai, uvāgacchittā mohummāya jaṇaṇāiṃ siṃgāriyāiṃ itthibhāvāiṃ uvadaṃsemāṇī-uvadaṃsemāṇī mahāsatayaṃ samaṇovāsayaṃ evaṃ vayāsī–haṃbho! mahāsatayā! samaṇovāsayā! kiṃ ṇaṃ tubbhaṃ devānuppiyā! dhammeṇa vā puṇṇeṇa vā saggeṇa vā mokkheṇa vā, jaṃ ṇaṃ tumaṃ mae saddhiṃ orālāiṃ mānussayāiṃ bhogabhogāiṃ bhuṃjamāṇe no viharasi?
tae ṇaṃ se mahāsatae samaṇovāsae revatīe gāhāvaiṇīe eyamaṭṭhaṃ no āḍhāi no pariyāṇāi, aṇāḍhāyamāṇe apariyāṇamāṇe tusiṇīe dhammajjhāṇovagae viharai| tae ṇaṃ sā revatī gāhāvaiṇī mahāsatayaṃ samaṇovāsayaṃ doccaṃ pi taccaṃ pi evaṃ vayāsī|
tae ṇaṃ se mahāsatae samaṇovāsae revatīe gāhāvaiṇīe doccaṃ pi taccaṃ pi evaṃ vutte samāṇe āsuratte ruṭṭhe kuvie caṃḍikkie misimisīyamāṇe ohiṃ pauṃjai, pauṃjittā ohinā ābhoei, ābhoettā revatiṃ gāhāvaiṇiṃ evaṃ vayāsī–haṃbho! revatī! appatthiyapatthie! duraṃta-paṃta-lakkhaṇe! hīnapuṇṇacāuddassie! siri-hiri-dhii-kitti-parivajjie! evaṃ khalu tumaṃ aṃto sattarattassa alasa-eṇaṃ vāhiṇā abhibhūyā samāṇī aṭṭa-duhaṭṭa-vasaṭṭā asamāhipattā kālamāse kālaṃ kiccā ahe imīse rayaṇappabhāe puḍhavīe loluyaccue narae caurāsītivāsasahassaṭṭhiiesu neraiesu neraiyattāe uvavajjihisi|
no khalu kappai goyamā! samaṇovāsagassa apacchimamāraṇaṃtiyasaṃlehaṇā-jjhūsaṇā-jjhūsiyassa bhattapāna-paḍiyāikkhiyassa paro saṃtehiṃ taccehiṃ tahiehiṃ sabbhūehiṃ aniṭṭhehiṃ akaṃtehiṃ appiehiṃ amaṇunnehiṃ amaṇāmehiṃ vāgaraṇehiṃ vāgarittae| taṃ gaccha ṇaṃ devānuppiyā! tumaṃ mahāsatayaṃ samaṇovāsayaṃ evaṃ vayāhi–no khalu devānuppiyā! kappai samaṇovāsagassa apacchimamāraṇaṃtiyasaṃle-haṇā-jjhūsaṇā-jjhūsiyassa bhattapāna-paḍiyāikkhiyassa paro saṃtehiṃ taccehiṃ tahiehiṃ sabbhūehiṃ aniṭṭhehiṃ akaṃtehiṃ appiehiṃ amaṇunnehiṃ amaṇāmehiṃ vāgaraṇehiṃ vāgarittae tume ya ṇaṃ devānuppiyā! revatī gāhāvaiṇī saṃtehiṃ taccehiṃ tahiehiṃ sabbhūehiṃ aniṭṭhehiṃ akaṃtehiṃ appiehiṃ amaṇunnehiṃ amaṇāmehiṃ vāgaraṇehiṃ vāgariyā| taṃ ṇaṃ tumaṃ eyassa ṭhāṇassa āloehi paḍikkamāhi niṃdāhi gari-hāhi viuṭṭāhi visohehi akaraṇayāe abbhuṭṭhāhi ahārihaṃ pāyacchittaṃ tavokammaṃ paḍivajjāhi|
tae ṇaṃ se bhagavaṃ goyame samaṇassa bhagavao mahāvīrassa taha tti eyamaṭṭhaṃ vinaeṇaṃ paḍisuṇei, paḍisuṇettā tao paḍinikkhamai, paḍinikkhamittā rāyagihaṃ nayaraṃ majjhaṃmajjheṇaṃ anuppavisai, anuppavisittā jeṇeva mahāsatagassa samaṇovāsagassa gihe jeṇeva mahāsatae samaṇovāsae, teṇeva uvāgacchai|
tae ṇaṃ se mahāsatae samaṇovāsae bhagavaṃ goyamaṃ ejjamāṇaṃ pāsai, pāsittā haṭṭhatuṭṭha-cittamāṇaṃdie pīimāṇe paramasomaṇassie harisavasavisappamāṇa hiyae bhagavaṃ goyamaṃ vaṃdai namaṃsai|
tae ṇaṃ se bhagavaṃ goyame mahāsatayaṃ samaṇovāsayaṃ evaṃ vayāsī–evaṃ khalu devānuppiyā! samaṇe bhagavaṃ mahāvīre evaṃ āikkhai bhāsai pannavei parūvei–no khalu kappai devānuppiyā! samaṇovāsagassa apacchimamāraṇaṃtiyasaṃlehaṇā-jjhūsaṇā-jjhūsiyassa bhattapāna-paḍiyāikkhiyassa paro saṃtehiṃ taccehiṃ tahiehiṃ sabbhūehiṃ aniṭṭhehiṃ akaṃtehiṃ appiehiṃ amaṇunnehiṃ amaṇāmehiṃ vāgaraṇehiṃ vāgarittae| tume ṇaṃ devānuppiyā! revatī gāhāvaiṇī saṃtehiṃ taccehiṃ tahiehiṃ sabbhūehiṃ aniṭṭhehiṃ akaṃtehiṃ appiehiṃ amaṇunnehiṃ amaṇāmehiṃ vāgaraṇehiṃ vāgariyā| taṃ ṇaṃ tumaṃ devānuppiyā! eyassa ṭhāṇassa āloehiṃ paḍikkamāhiṃ niṃdāhiṃ garihāhiṃ viuṭṭāhi visohehi akaraṇayāe abbhuṭṭhāhi ahārihaṃ pāyacchittaṃ tavokammaṃ paḍivajjāhi|
tae ṇaṃ se mahāsatae samaṇovāsae bhagavao goyamassa taha tti eyamaṭṭhaṃ vinaeṇaṃ paḍisuṇei, paḍisuṇettā tassa ṭhāṇassa āloei paḍikkamai niṃdai garihai viuṭṭai visohei akaraṇayāe abbhuṭṭhei ahārihaṃ pāyacchittaṃ tavokammaṃ paḍivajjai|
tae ṇaṃ se bhagavaṃ goyame mahāsatagassa samaṇovāsagassa aṃtiyāo paḍinikkhamai, paḍinikkhamittā rāyagihaṃ nayaraṃ majjhaṃmajjheṇaṃ niggacchai, niggacchittā jeṇeva samaṇe bhagavaṃ mahāvīre, teṇeva uvāgacchai, uvāgacchittā samaṇaṃ bhagavaṃ mahāvīraṃ vaṃdai namaṃsai, vaṃdittā namaṃsittā saṃjameṇaṃ tavasā appāṇaṃ bhāvemāṇe viharai|
tae ṇaṃ samaṇe bhagavaṃ mahāvīre annadā kadāi rāyagihāo nayarāo paḍinikkhamai, paḍinikkhamittā bahiyā janavayavihāraṃ viharai|