Uvasagadasao 8.54

8.54

tae ṇaṃ sā revatī gāhāvaiṇī annadā kadāi mattā luliyā viiṇṇakesī uttarijjayaṃ vikaḍḍhamāṇī-vikaḍḍhamāṇī jeṇeva posahasālā, jeṇeva mahāsatae samaṇovāsae, teṇeva uvāgacchai, uvāgacchittā mahāsatayaṃ samaṇovāsayaṃ evaṃ vayāsī– haṃbho! mahāsatayā! samaṇovāsayā! kiṃ ṇaṃ tubbhaṃ devānuppiyā! dhammeṇa vā puṇṇeṇa vā saggeṇa vā mokkheṇa vā, jaṃ ṇaṃ tumaṃ mae saddhiṃ orālāiṃ mānussayāiṃ bhogabhogāiṃ bhuṃjamāṇe no viharasi?
tae ṇaṃ se mahāsatae samaṇovāsae revatīe gāhāvaiṇīe eyamaṭṭhaṃ no āḍhāi no pariyāṇāi, aṇāḍhāyamāṇe apari-yāṇamāṇe tusiṇīe dhammajjhāṇovagae viharai|
tae ṇaṃ sā revatī gāhāvaiṇī mahāsatayaṃ samaṇovāsayaṃ doccaṃ pi taccaṃ pi evaṃ vayāsī–haṃbho! mahāsatayā! samaṇovāsayā! kiṃ ṇaṃ tubbhaṃ devānuppiyā! dhammeṇa vā puṇṇeṇa vā saggeṇa vā mokkheṇa vā, jaṃ ṇaṃ tumaṃ mae saddhiṃ orālāiṃ mānussayāiṃ bhogabhogāiṃ bhuṃjamāṇe no viharasi?
tae ṇaṃ se mahāsatae samaṇovāsae revatīe gāhāvaiṇīe doccaṃ pi taccaṃ pi evaṃ vutte samāṇe āsuratte ruṭṭhe kuvie caṃḍikkie misimisīyamāṇe ohiṃ pauṃjai, pauṃjittā ohinā ābhoei, ābhoettā revatiṃ gāhāvaiṇiṃ evaṃ vayāsī–haṃbho! revatī! appatthiyapatthie! duraṃta-paṃta-lakkhaṇe! hīṇapuṇṇacāuddassie! siri-hiri-dhii-kitti-parivajjie! evaṃ khalu tumaṃ aṃta sattarattassa alasaeṇaṃ vāhiṇā abhibhūyā samāṇī aṭṭa-duhaṭṭa-vasaṭṭā asamāhipattā kālamāse kālaṃ kiccā ahe imīse rayaṇappabhāe puḍhavīe loluyaccue narae caurāsītivāsasahassaṭṭhiiesu neraiesu neraiyattāe uvavajjihisi|
tae ṇaṃ sā revatī gāhāvaiṇī mahāsataeṇaṃ samaṇovāsaeṇaṃ evaṃ vuttā samāṇī–ruṭṭhe ṇaṃ mamaṃ mahāsatae samaṇovāsae! hīṇe ṇaṃ mamaṃ mahāsatae samaṇovāsae! avajjhāyā ṇaṃ ahaṃ mahāsataeṇaṃ samaṇovāsaeṇaṃ, na najjai ṇaṃ ahaṃ keṇāvi kumāreṇaṃ mārijjissāmi–tti kaṭṭu bhīyā tatthā tasiyā uvviggā saṃjāyabhayā saṇiyaṃ-saṇiyaṃ paccosakkai, paccosakkittā jeṇeva sae gihe, teṇeva uvāgacchai, uvāgacchittā ohayamaṇasaṃkappā ciṃtāsogasāgarasaṃpaviṭṭhā karayalapalhatthamuhā aṭṭajjhā-ṇovagayā bhūmigayadiṭṭhiyā jjhiyāi|
tae ṇaṃ sā revatī gāhāvaiṇī aṃto sattarattassa alasaeṇaṃ vāhiṇā abhibhūyā aṭṭa-duhaṭṭa-vasaṭṭā kālamāse kālaṃ kiccā imīse rayaṇappabhāe puḍhavīe loluyaccue narae caurāsītivāsasahassaṭṭhiiesu neraiesu neraiyattāe uvavaṇṇā|