Biha Kappa v1.p429

v1.p429

[rāībhattapagayaṃ ::4 (caturlaghu) | suddhapade tti suddhaṃ suddhaṇeyaṃ | 'jaṃvā āvajjai'tti āyavirāhaṇaṃ saṃjamavirāhaṇaṃ ca | āyāe khāṇukaṃṭagādīhiṃ | saṃjame uggamādīhiṃ asuddhaṃ geṇhejja palaṃbādī vā geṇhejja |
nāṇaṭṭha daṃsaṇaṭṭhā, caritaṭṭhā evamāi gaṃtavvaṃ | uvagaraṇapuvvapaḍilehieṇa sattheṇa gaṃtavvaṃ ||2879|| "nāṇaṭṭha0" gāhā | tattha nāṇaṭuṃ daṃsaṇaṭṭhāe ya imaṃ vakkhāṇaṃ - saguru kula sadese vā, nāṇe gahie saī ya sāmatthe | vaccai u annadese, daṃsaṇajuttāiattho vā ||2880||
"saguru0" gāhā | appaṇo āyariyassa jattio āgamo tammi savvammi gahie| svadeśe yo'nyeṣāmācāryāṇāmāgamaḥ tasminnapi gṛhīte | evaṃ ṇāṇaṭṭha-dasaṇaṭṭhāe |
idāṇi carittaṭṭhā | asya vyākhyā -
paḍikuṭṭha desa kāraṇa, gayā u taduvarami niti caraṇaṭṭhā | asivāī va bhavissai, bhūe va vayaṃti paradesaṃ ||2881||
"paḍikuṭṭa desa0" gāhā | siṃdhudesaṃ pacchābhūmidesaṃ vā asivādīhiṃ kāraṇehiṃ gayā | 'bhūte va' tti sāṃprataṃ vaṭṭati | sesaṃ kaṇṭhyam | tao paḍiṇipphiḍitukāmāṇaṃ uvagaraṇaṃ puvva paḍilehieṇa sattheṇa gaṃtavvaṃ ti | kāṇi tāṇi uvagaraṇāṇi? ucyate -
cammāilohagahaṇaṃ, naṃdībhāṇe ya dhammakarae ya | parautthiyauvakaraṇe, guliyāo kholamāīṇi ||2882|| taliga puḍaga vajhe yā, kosaga kattī ya sikkae kāe | pippalaga sūḍū āriya, nakkhaccaṇi satthakose ya ||2883|| taliyāu rattigamaṇe, kaṃṭuppaheṇa sāvae asahū | puḍagā vivacci sīe, vajjho puṇa chinnasaṃdhaṭṭhā ||2884|| kosaga naharakkhaṭṭā, himā'hikaṃṭaisū u khapusādī | kattī vi vikaraṇaṭṭhā, vivitta puḍhavāirakkhaṭṭhā ||2885|| tahiṃ sikkaehim̐ hiṃḍati, jattha vivittā va palligamaṇaṃ vā | paraliṃgaggahaṇammi vi, nikkhivaṇaṭṭhā va annattha ||2886||