Biha Kappa v1.p488

v1.p488

|| viyārabhūmī-vihārabhūmīpagayaṃ || [suttaṃ] no kappati niggaṃthassa egāṇiyassa rāo vā viyāle vā bahiyā viyārabhūmi vā vihārabhūmiṃ vā nikkhamittae vā pavisittae vā | kappai se appabiiyassa vā appataiyassa vā rāo vā viyāle vā bahiyā viyārabhūmi vā vihārabhūmi vā nikkhamittae vā pavisittae vā ||1-48||
"no kappai niggaṃthassa egāṇiyassa0" suttaṃ uccāreyavvaṃ | sambandhe -
āhārā nīhāro, avassameso tu suttasaṃbaṃdho | taṃ puṇa ṇa ppaḍisiddhaṃ, vāre egassa nikkhamaṇaṃ ||3207|| "āhārā0" gāhā | kaṇṭhyā | niyuktivistaraḥ - rattiṃ viyārabhūmī, ṇiggaṃthegāṇiyassa paḍikuṭṭhā |
lahugo ya hoti māso, tattha vi āṇāiṇo dosā ||3208|| [ni0 ]
"rattiṃ viyāra0" gāhā | na vaṭṭai rattiṃ egāṇiyassa viyārabhūmi gaṃtuṃ | sā viyārabhūmī duvihā–kāie uccāre ya | tattha kāie tāva bhaṇati-jai jāti egāṇio māsalahuṃ, āṇādi |
teṇā''rakkhiyasāvayapaḍiṇīe thīṇapuṃsatericche |
ohāṇapehi vehāṇase ya vāle ya mucchā ya ||3209||
"teṇārakkhiya0" gāhā | teṇehiṃ duvihehiṃ uvahī so vā hīrejja, ārakkhiehiṃ vā giṇhaṇāī, sāvaehiṃ khajjejja, paḍiṇiehiṃ vā paṃtāvijjejja, itthī-ṇasao vā ekkāṇiyaṃ geṇhejja, tirikkho vā daṭṭo āhaṇejja, tirikkhajoṇiṃ vā paḍisevejja | 'vehāṇase' tti | asya vyākhyā -
thī paṃḍe tirigīsu va, khalito vehāṇasaṃ va odhāve | sesovadhīsarīre, gahaṇādī māraṇaṃ joe ||3210|| duppabhiī u agammā, ṇa ya sahasā sāhasaṃ samāyarati | vāreti ca ṇaṃ bitio, paṃca ya sakkhī u dhammassa ||3211||
"thī paṃḍe0' ["duppabhii u0"] gāhā | itthīe paṃḍaehiṃ vā khalio mehuṇapaḍisevaṇāe addhiīe vehāṇasaṃ karejja odhāṇuppehī vā gacchejja | 'sesa' tti sesāṇi dārāṇi | uvahīe vā bhayaṃ gahaṇādīyā vā hojja, mārejja vā, vālehi vā sāṇehiṃ vā khajjejja,