Biha Kappa v2.p152

v2.p152

561 5) āyario bhaṇati - suttaṇivāyaṃ ṇa yāṇasi, eyaṃ jiṇakappe suttaṃ nivayiyaṃ, therāṇaṃ puṇa kappe aṇuṇṇāto titthagarehiṃ, ageṇhaṃtassa doso pacchittaṃ ca vuttaṃ |
___ agahaṇe tti asya vyākhyā - mattayaṃ agiṇhaṃtā gurugā micchattaṃ | kahaṃ ? teṇa ceva paḍiggahageṇaṃ nillevitaṃ daṭuṃ adiṭṭhadhamma tti micchattaṃ gacchejja, ṇavasaḍḍhāṇa appaccao, jati paḍigahage āyariyāiṇa geṇhati appā catto, aha appaṇo geṇhati āyariyāi cattā | saṃsattaga bhattapāṇe kahiṃ geṇhau ? aha geṇhati appaḍilehite saṃjamavirāhaṇā | savitthārā chakkāya caulahugā| vārattaga tti -
vārattaga pavvajjā, putto tappaḍima devathali sāha | paḍiyaraṇegapaḍiggaha, āyamaṇuvvālaṇā cheo ||4066||
"vārattagapavvajjā0" gāhā | vārattagapuraṃ nagaraṃ | abhayaseṇo rāyā | tassa amacco vārattago ṇāma | so patteyabuddho pavvaio | tassa putteṇaṃ piuṇo bhattīe paḍimā kāritā | devakulaṃ thalī pavittiyā | tattha ya sāhū egeṇaṃ paḍiggaheṇaṃ geṇhati, te vi ya se bhikkhaṃ payatteṇaṃ deṃti | teṇeva paḍiggahageṇa pilleviti diṭṭho tehiṃ ṇijjūḍho, tehiṃ tāṇi bhāyaṇāṇi agaṇikātiyāṇi chaḍḍiyāṇi ya | aṇṇesiṃ ca sāhūṇaṃ khoḍitaṃ eyaṃ | 'cheo' niddhammāṇo tti |
jo māgahao pattho, savisesataraṃ tu mattagapamāṇaṃ | dosu vi davvaggahaṇaṃ, vāsāvāsāsu ahikāro ||4067||
"jo māgahao0" gāhā | 'dosu vi' = mattate paḍiggahagge ya, duvihaṃ bhattapāṇaṃ uḍubaddha vāsāsu ya | 'vāsāvāse ahigāro' tti | vāsāsu paḍhamaṃ ceva jattha dhammalābhei tattha pāṇagassa jogo kāyavvo | kiṃ kāraṇaṃ ? vāsaṃ vagghāriyaṃ kayāi paḍejjā jeṇa gharāto gharaṃ ṇa sakketi saṃcarituṃ tāhe levāḍo bhavati viṇā daveṇa | ahavā vāsāsu saṃsajjaṇaṃ bhavati teṇa vāsāsu ahigāro | ahavā imaṃ pamāṇaṃ -
sukkholla odaṇassā, dugāutaddhāṇamāgao sāhū | bhuṃjati egaṭṭhāṇe, etaṃ khalu mattagapamāṇaṃ ||4068|| bhattassa va pāṇassa va, egatarāgassa jo bhave bhario| pajjatto sāhussa u, bitiyaṃ pi ya mattayapamāṇaṃ ||4069||
1. abhagāseṇo - ba |