Biha Kappa v2.p397

v2.p397

[gaṇaṃtarovasaṃpayapagayaṃ “bhikkhugā0" gāhā | jaṃ si visae bhikkhugāṇa thalī boḍigāṇa vā ṇiṇhāṇa vā tattha ṭhiyā āyariyā te ya bhikkhugādī appanijjayaṃ siddhaṃtaṃ pannaveṃti ubbhāti ya | āyariyāṇa ya daṃsaṇaṃ pabhāvaṇesu ṇatthi khedo teṇa tuṇhittā acchaṃti teṇa |
loe vi a parivādo, bhikkhugamādī ya gāḍha camaḍhiṃti | vippariṇamaṃti sehā, obhāmijjaṃti saḍḍhā ya ||5427||
"loe vi a0" gāhā | kaṇṭhyā | to taṃ asahamāṇo ko vi ciṃtei-vaccāmi aṇṇaṃ gaṇaṃ, daṃsaṇapabhāvagāiṃ satthāṇi ahijjami | tassa taheva āpucchiūṇa gamaṇaṃ, vihīe-gaṃtavvaṃ |
rasagiddho va thalīe, paratitthiyatajjaṇaṃ asahamāṇo | gamaṇaṃ bahussutattaṃ, āgamaṇaṃ vādiparisā u ||5428|| vātaparāyaṇakuviyā, jati paḍisehaṃti sādhu laṭuṃ ca |
adha ciraṇugato amhaṃ, mā se pavattaṃ parihaveha ||5429||
"rasagiddho va0" ["vātaparāyaṇakuviyā0"] gāhā | āyariyo rasagehīe thalīe acchai, ṇecchai vihariuṃ | tattha ya tesiṃ paratitthiehiṃ saddahetusatthakusale hiṃ te sādhuṇo obhāsijjaṃti | tattha koi sīso taṃ asahaṃto āyariyaṃ āpucchittā gaṃtuṃ aṇṇaṃ gaṇaṃ daṃsaṇapabhāvagaṇi satthāī ahijjittā āgao, vāyajāṇagaparisāo gamettā parititthie nippiṭṭhapasiṇavāgaraṇe kāuṃ āyariyassa sagāsamāgao |
kāūṇa ya ppaṇāma, chedasutassā dalāha paḍipucchaṃ| aṇṇattha vasahi jaggaṇa, tesiṃ ca ṇivedaṇaṃ kāuṃ ||5430|| "kāūṇa ya0" gāhāpuvvaddhaṃ | asya vyākhyā
sadaṃ ca hetusatthaṃ, ahijjio chedasutta ṇaṭuṃ me | ettha ya mā asutatthā, suṇijja to aṇṇahiṃ vasimo ||5431||
"sadaṃ ca hetusatthaṃ0" puvvaddhaṃ | 'aṇṇattha vasahe' tti asya vyākhyā-"ettha ya0" pacchaddhaṃ | 'ettha' tti imāe vasahīe to'nnāe vasahīe vasāmo | tattha pāḍipucchaṃ dejjaha, so taṃ āyariyaṃ hariukāmo|
khittā''rakkhiṇiveyaṇa, itare puvvaṃ tu gāhitā samaṇā | jaggavito so a ciraṃ, jadha nijjaṃto ṇa cetetī ||5432||