Biha Kappa v2.p405

v2.p405

[gaṇaṃtarovasaṃpayapagayaṃ āloyaṇavihī bhaṇṇai
pāsatthāīmuṃḍiem̐, āloyaṇa hoi dikkhapabhiī tu | saṃviggapurāṇe puṇa, jappabhiī ceva osaṇṇo ||5469|| "pāsatthāī0" gāhā | kaṇṭhyā ||
[suttaṃ] gaṇāvaccheie ya gaṇādavakkamma icchejjā annaṃ gaṇaṃ saṃbhogapaḍiyāe uvasaṃpajjittāṇaṃ viharittae, ṇo se kappati gaṇāvaccheiyattaṃ aṇikkhivittā saṃbhogapaḍiyāe jāva viharittae; kappati se gaṇāvacchei attaṃ ṇikkhivittā jāva viharittae | ṇo se kappai aṇāpucchittā āyariyaṃ vā jāva viharittae; kappati se āpucchittā āyariyaṃ vā jāva viharittae | te ya se vitaraṃti evaṃ se kappati annaṃ gaṇaṃ saṃbhogapaḍiyāe jāva viharittae; te ya se no vitaraṃti evaṃ se ṇo kappati jāva viharittae | jatthuttariyaṃ dhammaviṇayaṃ labhejjā evaṃ se kappati annaṃ gaṇaṃ saṃ0 [saṃbhogapaḍiyāe uvasaṃpajjittāṇaṃ ] jāva viharittae; jatthuttariyaṃ dhammaviṇayaṃ no labhejjā evaṃ se ṇo kappati jāva viharittae ||4-24||
āyariya uvajjhāe ya gaṇādavakamma icchejjā annaṃ gaṇaṃ saṃbhoga-paḍiyāe jāva viharittae, ṇo se kappati āyariya uvajjhāyattaṃ aṇikkhivittā annaṃ gaṇaṃ saṃ0 [saṃbhogapaḍiyāe uvasaṃpajjittāṇaṃ ] jāva viharittae; kappati se āyariyauvajjhāyattaṃ ṇikkhivittā jāva viharittae | ṇo se kappati aṇāpucchittā āyariyaṃ vā jāva viharittae; kappati se āpucchittā āyariyaṃ vā jāva viharittayae | te ya se vitaraṃti evaṃ se kappati jāva viharittae; te ya se ṇo vitaraṃti evaṃ se ṇo kampati jāva viharittae | jatthuttariyaṃ dhammaviṇayaṃ labhejjā evaṃ se kappati jāva viharittae; jatthuttariyaṃ dhammaviṇayaṃ no labhejjā evaṃ se ṇo kappati jāva viharittae ||4-25||
emeva gaṇāvacche, gaṇiāyarie vi hoi emeva | ṇavaraṃ puṇa ṇāṇattaṃ, ete niyameṇa gīyā u||5470||