Vavahara 1.16

1.16

je bhikkhū bahusovi cāummāsiyaṃ vā bahusovi sāiregacāummāsiyaṃ vā bahusovi paṃcamāsiyaṃ vā bahusovi sāiregapaṃcamāsiyaṃ vā eesiṃ parihāraṭṭhāṇāṇaṃ annayaraṃ parihāraṭṭhāṇaṃ paḍisevittā āloejjā, apaliuṃciyaṃ āloemāṇe ṭhavaṇijjaṃ ṭhavaittā karaṇijjaṃ veyāvaḍiyaṃ| ṭhavie vi paḍisevittā se vi kasiṇe tattheva āruheyavve siyā|
puvviṃ paḍiseviyaṃ puvviṃ āloiyaṃ, puvviṃ paḍiseviyaṃ pacchā āloiyaṃ| pacchā paḍiseviyaṃ puvviṃ āloiyaṃ, pacchā paḍiseviyaṃ pacchā āloiyaṃ| apaliuṃcie apaliuṃciyaṃ, apaliuṃcie paliuṃciyaṃ| paliuṃcie apaliuṃciyaṃ, paliuṃcie paliuṃciyaṃ|
apaliuṃcie apaliuṃciyaṃ āloemāṇassa savvameyaṃ sakayaṃ sāhaṇiya je eyāe paṭṭhavaṇāe paṭṭhavie nivvisamāṇe paḍisevei, se vi kasiṇe tattheva āruheyavve siyā|