Vavahara 4.105

4.105

gāmānugāmaṃ dūijjamāṇo bhikkhū ya jaṃ purao kaṭṭu viharai se ya āhacca vīsaṃbhejjā, atthiyāiṃ ttha anne kei uvasaṃpajjaṇārihe, se uvasaṃpajjiyavve|
natthiyāiṃ ttha anne kei uvasaṃpajjaṇārihe, appaṇo ya se kappāe asamatte evaṃ se kappai egarāiyāe paḍimāe jaṇṇaṃ-jaṇṇaṃ disaṃ anne sāhammiyā viharaṃti taṇṇaṃ-taṇṇaṃ disaṃ uvalittae|
no se kappai tattha vihāravattiyaṃ vatthae, kappai se tattha kāraṇavattiyaṃ vatthae|
taṃsi ca ṇaṃ kāraṇaṃsi niṭṭhiyaṃsi paro vaejjā–vasāhi ajjo! egarāyaṃ vā durāyaṃ vā| evaṃ se kappai egarāyaṃ vā durāyaṃ vā vatthae,
no se kappai paraṃ egarāyāo vā durāyāo vā vatthae|
jaṃ tattha paraṃ egarāyāo vā durāyāo vā vasai, se saṃtarā chee vā parihāre vā|