Udayasundarikatha p71
Udayasundarīkathā p71
- Language
- Sanskrit
p71
tato'pi cāgre kenāpi sureṣvasahiṣṇunā rākṣasāpasadena daśānanaṃ śocyamānamākarṇitavatī | hā svarnāthaśikhoḍhaśāsana daśagrīva prabho kvāsi bho bhoḥ śauṇḍīra vinā tvayā'tra nagare hā paśya yadvartate | ye tvadvāraniṣeviṇaḥ praviśatā lokena dhṛṣṭāḥ padaiste tenaiva hahā śubhārthamathunā pūjyanta ete surāḥ || anyato'pyekatra nirjanāyatanamaṇḍapasya garbhe viśrāntimilitairvaideśikaniśācarairanyonyārabdhavārtayā rāvaṇavadhe vidhervaiparītyamatyantavismayātsanirvaidamudbhāvyamānamaśrṛṇavam | sevito yaiḥ surairbhūtvā taireva daśakandharaḥ | hā hato markaṭairbhūtvā vaiparītyamaho vidheḥ || evamaparamanyatrāpīdṛgvidhaṃ vyatikara manekaṃśaḥ sthāne sthāne vividharūpamupalabhyavatī | ityādikaṃ pratipradeśamabhito rāmarāvaṇīyaṃ vṛttāntamupasthānamilitena sarabhasamapūrvatāpasīdarśanakutūhalinā purāṇalokenā''khyāyamānamavadhārayantī nagaramākoṇakuharāntarālamantarbahiśca paribhramya na kvacitkiñcana kiṃvadantīmātrakamapyudayasundaryā labhamānā nirāśībhūya vimucya ca saralaṃ viṣādapūtkāramatisatvaraṃ nirgatya tasmāllaṅkāpurīpradeśānmalayādigirendrakukṣiṣu krīḍāspadāni vidyādharakumārakāṇāmuddiśya gantumārabdhavatī | te'pi bhavyayuvatiratnāpahāriṇaḥ prasiddhāstataśca tatra kutrāpyavaśyamasau bhaviṣyatītyāśayā vrajantī kvāpyekasminnekahelayaiva pravaragiritaṭotsaṅgatakagaharasya garbhe trāyatāṃ trāyatāmiti pūtkurvantamuparacitabrāhmaṇarūpamamuṃ niśācarāpasadamadrākṣam | hā hā brāhmaṇo'yamārtta iti ca balavatyā karuṇayā preryamāṇahṛdayā samīpamupasṛtya sādaramapṛccham-bho dvijanman ! kena te trāṇamutpadyata ityasāvuktaḥ sudarśane kathamidaṃ vacmi yadi bhavatyā kiletyāveditavān | atha mayāpyaho kā tarhi cintā mayā cetpratīkārastadāvedaya tvaritaṃ katamā tavārtiravaśyaṃ yadeva brūṣe tatheti tvadvacaḥ pratikaromīti pratipanne saharṣameṣo'bravīt-sādhu sādhu pratijñātamidānīṃ kathayāmyatra khalu vikasitanekanalatāviralaparimalonmādini pradeśe jhaṭityadṛṣṭaśarīrekeṇāgatya hatakenāmunā puṣpaśilīmukhena bahuśo viddhyamānahṛdayaṃ dayāvati tvameva māṃ rakṣitumadhīśvarā'sīti | vajrapātasamatulena tenāsya vacasā hā dhik kimāpannamanaṅgaśarapīḍitena durātmanā chalitā'hametena | ko hi kila dvijo bhūtvā tapasvini jane smarāturaṃ manaḥ kurvannatyantamidaṃ garhitamācarati tadasau kṛtakamūrttiragrajanmā na sākṣāt| sākṣātpunaraparo vipraveṣāpahutasvajātiḥ krūrakarmā kaścit | ataḥ kiṃ karomi bhavatu chalitā'pi vacaśchalena chalayāmyenamiti saṃpradhārya vipāṭya ca nijasyāvaraṇavalkalasyaikamañcalamaho mahānubhāva gṛhāṇa prāvṛṇu sarvāṅgamamuṃ kavacaprāyamatipragāḍhapuṭaṃ valkalapaṭañcaivaṃ kṛte na kevalamasāveva purovartiviṭapakusume niviṣṭaḥ śilīmukho niyatamanye'pi kānane'sminkusumakuṭīravāsino madhuvratā na te lagiṣyanti | eṣa te puṣpaśilīmukhena viddhyamānahṛdayasya mayā kṛtaḥ paritropāyaḥ, pālitaṃ ca nijaṃ pratijñātaṃ, pratikṛtaṃ vacastvadīyaṃ, tathyavacanā ca jātā'smi, yāmi saṃpratītyevamabhidhāya nanvasau na jñāyate kaścidityaṃ nirākṛtaḥ kopādanyadeva kimapyācaratītyantarāśaṅkitena manasā jhagityupasaraṇādhiyā tathaiva gaganamutpatya pracalitā'smi