Udayasundarikatha p97

p97

udayasundarī ca hā hā suhṛdduḥkhite priyasakhi tārāvali sa tvayā'smanmanoviṣayanāyakaḥ samyagjñātānvayanāmavasatirālokito'pi punaridānīṃ dūrīkṛto daivena | kiṃca so'pi madarthamitthameva tāmyannāste | ka punarasāvālokanīyaḥ kathamālokanīyaḥ kadā cālokanīya iti vilapya saviṣādasudayavegavatīṃ mūrcchāmagacchat | tārāvalī tu hā hā svāmini ! hā nijavaṃśavaijayanti ! hā kandarpavijayaśrīḥ ! hā tribhuvanālaṅkāramuktāvali ! kiṃ kiṃ kimivācetanībhūtā'si, kimadyāhlādini ! mṛgāṅkamūrttirivāstamupayāntī jagadapyetadandhakārayiṣyasi, hā hā muṣitā muṣitā'smīti secanārthamānetuṃ salilamatisatvaraṃ gatavatī | atha rājā nitāntamākulībhūya pradhāvito hā hā virasaparyanta eṣa saṃvṛtto vyatikaraḥ | tadyadi punarasau maṇiryathā kāyaparīvarttanavikāramapaharati tathā mūrcchādivyapāyaharo'pi jāyata ityākūtasatvaramutthāya gṛhītvā ca taṃ maṇiṃ tadgarbhitena pāṇinā sudṛḍhamudayasundarīṃ kare jagrāha | atrāntarejhagiti tasya maṇeḥ prasaṅgāducchinnamūrcchamapamudbhavilocanā'sau | vegotthitādhṛtakarāgramanaṅgarūpa magre narendramavanītilakaṃ dadarśa || tataśca— tasyāḥ so'yamiti jñāte tasminnāvirabhūdrasaḥ | sa ko'pi yamudāharttumabhūjjāḍyaṃ vidherapi || anantaraṃ ca— sā tasya pātumalagattṛṣiteva tanvī rūpāmṛtaṃ navakaṭākṣamṛṇālakena | tāmapyanaṅgadahanaglapitāmadabhra— dṛṣṭicchaṭābhirabhito'pi nṛpaḥ siṣeca || tatastayornūtanasaṃgamotsabapramodaloleva savegamantare | parasparāviṣṭakaṭākṣasaṃkrame ratiḥ karoti sma gatāgatāni(vai ?) || evamanayoḥ snapanakeneva madanaśramajalena snātayorhastamelāpakeneva maṇinā sanāthakaratalayoḥ pārśvataḥ prasaratā dvijodghoṣeṇa vṛttamivākūtaviśeṣaprakriyopacāraṃ pāṇigrahaṇam | abhinanditaṃ ca pavanollāsitāni jalormiśikharaśīkarākṣatakulāni tarulatāpravālakusumāni ca sanmukhamivanikṣipantībhiḥ jalavanādhidevatābhiḥ | atha rasādudayasundarī svedajalakaṇanikaradanturamudbhinnapulakamākampaṃ śarīramāvahantī trapayā sasmitamavanamya vadanakamalamaho muñcata māmiti śanairatimṛdumadhuramālapantī karatalākarṣaṇaprayāsamakarot | rājā'pi saharṣamīṣadvihasya bahurasopalālitena manasā sanarmasandarbhamabravīt | mudhaiva tanvaṅgi sarojasundaraṃ (karaṃ) kimākarṣasi komalodaram | sphuṭākṣaraṃ candramukhi tvamucyase cireṇa labdhā'dya kathaṃ vimucyase || anantaramabjinīpalāśapuṭabharitamudakamādāya savegamāyāntī tārāvalī vilokya dūrādeva rājānamānandanirbhareṇa cetasā tattathā tadīyaṃ saṅgamamabhinandantī sādhu sādhu sampannam | aho kutaḥ, kuto'tra, kathamatra, kimatra, samastajagadājīvanaikaheturekākī devaḥ, iti savismayotsekamāpṛcchadya manāk tenaiva payasā tayoravatāraṇakamaṅgalamakarot | rājā'pi viśvabhūteḥ śiṣyāgamanakṣaṇātprabhṛtyakhilaṃ svīyamanubhūtaviṣayaṃ vyatikaramāvedayāñcakre || tadanu turagabhāvabhraṃśamūrcchāpahāra— pravaṇaparamaśaktikhyāpanāpūrvakaṃ tam | maṇimakhilamayūkhollikhitāntarikṣaṃ vyataradamṛtadhārāstrāvisārasvataśrīḥ || iti kaviśrīsoḍhḍhalavinirmitāyāmudayasundarīkathāyāmubhayamelako nāma sārasvataśrīpaṭṭāṅkaḥ saptama ucchvāsakaḥ || aṣṭama ucchvāsakaḥ || athaidamavasare sapadi nipattaducaṇḍahlādinīttatkāramodaram, durdaśā(rśā?) surasamarasaṃrambhakupitakātyāyanīkaṭhorahuṅkāradāruṇam, akṣavadhapradhāvitapavananandanotkalitakilikilārāvabhāsuram, arivarganigrahātiviṣamabhīmanirmuttaghanasiṃhanādameduram, aśeṣataḥ pratiśabditādrikandarasarovaram, ākulīkṛtasakalajalasattvam, utrāsitavanaśakuntam, āvibhratā cūtakāra(huṃkāra?)paṭalena sphoṭayanniva hemāṇḍamaṇḍalam, udaśritayā capeṭayā pāṭayanniva nabhastalam, vehlatā lāṅgūlavalayena rundhanniva diṅmukhāni, roṣānalajvalitayā dṛśā dahanniva medinīm, niṣkarṣabhīṣaṇayā dantapariṣadā gilanniva jaganti, yāvakarasānukāriṇībhiḥ kapolakāntibhirvarṣanniva riṣṭarudhiradhārābhiraniṣṭadarśano nidrāntasamutthitaḥ sa khalu sahasaiva dūrāttārāvalyā'bhinandyamānaṃ svīkṛtodayasundarīkamurvīpatiṃ vilokya nikāmakupitaḥ pradhāvito javādājagāma kuto'pi sambhṛtabalo golāṅgūlaḥ sāmarṣo dṛsaśca prāvarttata bhujākṣepe kṣitīśvarasya