Meghaduta 2.21

2.21

nūnamiti || prabalaruditenocchūne ucchvasite netre yasya tat || ucchūneti śvayateḥ kartari ktaḥ || “oditaśca” iti niṣṭhānatvam | “vacisvapi—” ityādinā saṃprasāraṇam | “saṃprasāraṇācca” iti pūrvarūpatvam | “halaḥ” iti dīrghaḥ || “chvoḥ śūḍanunāsike ca” ityūṭhādeśe kṛte rūpasiddhiriti vartamānasāmīpyaprakriyā prāmādikītyupekṣyā | tathā sati dhātorikārasya gatyabhāvādūṭhādeśe (?) cchvorantyatvena viśeṣaṇācceti || etena viṣādo vyajyate | niḥśvāsānāmaśiśiratayānta-
stāpoṣṇatvena bhinnavarṇo vicchāyo'dharoṣṭho yasya tat | haste nyastaṃ hastanyastam | etena cintā vyajyate || lambālakatvātsaṃskārābhāvālambamānakuntalatvādasakalavyaktyasaṃpūrṇābhivyakti tasyāḥ priyāyā mukhaṃ tvadanusaraṇena tvaduparodhena | meghānusaraṇeneti yāvat | kliṣṭakānteḥ kṣīṇakānterindordainyaṃ śocyatāṃ bibharti | nūnamiti vitarke || “nūnaṃ tarke'rthaniścaye” ityamaraḥ || pūrvavattathāpi na bhramitavyamiti bhāvaḥ || sarvavirahiṇīsādhāraṇāni lakṣaṇāni saṃbhāvanayollekhyānityāha “āloke” ityādibhistribhiḥ—