Meghaduta 2.31

2.31

jāna iti || he megha, tava sakhyā mano mayi saṃbhṛtasnehaṃ saṃcitānurāgaṃ jāne | asmātsnehajñānakāraṇātprathamavirahe | prathamagrahaṇaṃ duḥkhātiśayadyotanārtham | tāṃ tvatsakhīmitthaṃbhūtāṃ pūrvoktāvasthāmāpannāṃ tarkayāmi || nanu subhagamānināmeṣa svabhāvo yadātmani strīṇāmanurāgaprakaṭanaṃ tatrāha-vācālamiti || subhagamātmānaṃ manyata iti subhagaṃmanyaḥ || "ātmamāne khaśca" iti khaśpratyayaḥ | "arurdviṣadva-" ityādinā mumāgamaḥ || tasya bhāvaḥ subhagaṃmanyabhāvaḥ subhagamānitvaṃ māṃ vācālaṃ bahubhāṣiṇaṃ na karoti khalu | saundaryābhimānitāṃ na prakaṭayāmītyarthaḥ || "syājjalpākastu vācālo vācāṭo bahugarhyavāk" ityamaraḥ || "ālajāṭacau bahubhāṣiṇi" ityālacpratyayaḥ || kiṃtu he bhrātaḥ, mayoktaṃ yat "ādhikṣāmām" ityādi tannikhilaṃ sarvamacirācchīghrameva te tava pratyakṣam | bhaviṣyatīti śeṣaḥ ||