Meghaduta 2.43

2.43

māmiti || suptasya vijñānaṃ svapnaḥ || “svapnaḥ suptasya vijñānam’ iti viśvaḥ || saṃdarśanaṃ saṃvit | darśanaṃ samaye śāstre dṛṣṭau svapne'kṣiṇa saṃvidi ||” iti śabdārṇave || svapnasaṃdarśanāni svapnajñānāni || cūtavṛkṣādivatsāmānyaviśeṣabhāvena sahaprayogaḥ || teṣu mayā kathamapi mahatā prayatnena labdhāyā gṛhītāyāḥ | dṛṣṭāyā iti yāvat || te tava nirdayāśleṣo gāḍhāliṅganaṃ sa eva hetustasya | nirdayāśleṣārthamityarthaḥ || “ṣaṣṭhī hetuprayoge” iti ṣaṣṭhī || ākāśe nirviṣaye praṇihitabhujaṃ prasāritabāhuṃ māṃ paśyantīnāṃ sthalīdevatānāṃ muktā mauktikānīva sthūlā aśruleśā bāṣpabindavastarukisalayeṣu | anena celāñcalenāśrudhāraṇasamādhirdhvanyate | bahuśo na patantīti na | kiṃtu patantyevetyarthaḥ || niścaye nañdvaya-
prayogaḥ | tathā cādhikārasūtram—"smṛtiniścayasiddhārtheṣu nañdvayaprayogaḥ siddhaḥ" iti | "mahātmagurudevānāmāśrupātaḥ kṣitau yadi | deśabhraṃśo mahatduḥkhaṃ maraṇaṃ ca bhaveddhruvam ||" iti kṣitau devatāśrupātaniṣedhadarśanādyakṣasya maraṇābhāvasūcanārthaṃ tarukisalayeṣu patantītyuktam || idānīṃ tadaṅgaspṛṣṭavastudarśanamāha—