Meghaduta 2.44

2.44

bhittveti || devadārudrumāṇāṃ kisalayapuṭānpallavapuṭānsadyo bhittvā | tatkṣīrasrutisurabhayasteṣāṃ devadārudrumāṇāṃ kṣīrasrutibhiḥ kṣīraniṣyandaiḥ surabhayaḥ sugandhayaḥ | tuṣārādrijātatve liṅgamidam | ye vātā dakṣiṇena dakṣiṇamārgeṇa || tṛtīyāvidhāne prakṛtyādibhya upasaṃkhyānāttṛtīyā samena yātītivat | tatrāpi karaṇatvasya pratīyamānatvāt "kartṛkaraṇayoreva tṛtīyā" iti bhāṣyakāraḥ || pravṛttāścalitāḥ he guṇavati sauśīlyasaukumāryādiguṇasaṃpanne, te tuṣārādrivātāḥ pūrvaṃ prāgebhirvātaistavāṅgaṃ spṛṣṭaṃ bhavedyadi kileti saṃbhāvitametaditi buddhyetyarthaḥ || "vārtāsaṃbhāvyayoḥ kila" ityamaraḥ || mayāliṅgyanta āśliṣyante || atra vāyūnāṃ spṛśyatve'pyamūrtatvenāliṅganāyogādāliṅgyanta ityabhidhānaṃ yakṣasyonmattatvātpralapitamityadoṣa iti vadanniruktakāraḥ svayamevonmattapralāpītyupekṣaṇīyaḥ ||